Shillong, Nohprah 02 : U Myntri Rangbah ka Jylla bad National President ka National Peoples’ Party (NPP) Conrad K Sangma hynne ka sngi thohdieng, ula pynkut shisyndon ia ka jingiamutdur jong ki briew ba u don jingthmu ban mih aireng na artylli ki Constituency ha ka elekshon MLA-2023 ha Jylla.
Kat kum ka jingong jong u “Ngan mih iakhun beit thik tang na South Tura Constituency ha kane ka elekshon ban wan”.
“Da lei lei ruh em, ngan ym mih iakhun na artylli ki Constituency….ia mynta hi ngan mih aireng na South Tura Constituency” ula ong haba iakren bad ki nongthoh khubor hynne ka janmiet.
“Nga la long shai halor kane ka bynta, nga don ka jingngeit ba pura ha ka constituency lajong. Nga la trei shitom ha ka constituency jong nga bad nga la tei bha ia ka” ula bynrap.
U Myntri Rangbah ula ong ruh ba ia mynta hi, u khlem pat rai ban mih aireng na kawei pat ka Constituency.
“Ka Party (NPP) kam pat rai satia halor kane, ngin sa peit shuwa ia ka jinglong jingman kumno ba ka long hynrei kumba nga ong ba ka South Tura constituency ka dei ka constituency ia mynta bad ia mynta hi nga don jingthmu tang na kane ka constituency ban iakhun ia ka elekshon” ula ban jur.
