Shillong, Nohprah 02 : U Myntri Rangbah ka Jylla Conrad K Sangma hynne ka sngi thohdieng, ula pynrem jur ia ka jingkren jong u Chief Executive Member (CEM) ka Karbi Anglong Autonomous Council (KAAC) Tuliram Tongkhang, uba kam ba ki Khasi-Pnar bas ah ha shnong Mukroh, West Jaintia Hills ki dei kiba shu wan shong be-ain.
U Myntri Rangbah ula ong ba ka jingjia ha Mukroh ka dei kaba tynjuh bha bad kum kine ki jingkren ki dei ki bym iahap satia.
“Kum kine ki jingkren kim dei satia ban mih, ngim sngewtynnad ia kine ki jingkren, kine ki dei ki por ba ngi mad ia ki jingeh bad kum kine ki jingkren kin nym iarap ban tem ia ka jinglong jingman” ula ong.
U Myntri Rangbah ula pyntip ruh ba ula dep ban kren bad u Myntri Rangbah ka Assam Himanta Biswa Sarma bad ka jingkren ha ka kyrdan jong ki Myntri Rangbah ka dei ka nongrim jong baroh artylli ki Sorkar Jylla.
“U (Biswa) la pyntip ia nga ba kum kine ki jingkren kim dei satia ha kaban mih hynrei kaei kaba kongsan ka long ba kin don beit ki riew shimet bad ki briew na ki kyrdan bapher bapher ki ban iai kren….haba kut hi, ka shong ha ki nongialam ha ka kyrdan ki Myntri Rangbah, kine ki jingkren (Myntri Rangbah) ki dei ia kaba hap khmih kum ka nongrim jong kano kano ka Sorkar” ula ban jur.
