Shillong, Nohprah 02 : Ki Nongialehkai Muay Thai ka All Meghalaya Muay Thai Association (AMMTA) kila wanrah ia ka ban ia ka Jylla da ka jingioh khur katto katne ki takma naka Manipur Sangai Festival 3rd Amateur Muay Thai Championship 2022.
Ka AMMTA kaba la seng da u Bah Samuel Hashah ha u snem 2016, kala iashimbynta kane ka lympung ialehkai kaba la long ha ka 28 bad 29 tarik Naiwieng 2022.
Ka Manipur Sangai Festival 3rd Amateur Muay Thai Championship ka dei kaba la ithuh da ka Manipur Olympic Association hapoh ka Tnad Sports & Youth Affairs ha kaba ki nongialehkai na ka Jylla Meghalaya kila jop haduh 4 tylli ki takma baroh lang.
“Kane ka dei ka jingsarong ia ki nongshongshnong ka Jylla, haba ngi leit iashimbynta ha kino kino ki lympung ngim pat ju wan phai thylli hynrei ngi la wanrah lang bad ki takma” ong u Bah Samuel Hashah uba dei u President ka AMMTA.
Ki Nongialehkai kiba khubor takma ha ka Manipur Sangai Festival 3rd Amateur Muay Thai Championship 2022 ki kynthup ia u Shanbor Kurbah ha ka kyrdan ialehkai 45-50kg shapoh bad u Kordor Rynjah U-45-48kg kiba la ioh ia ka takma ksiar, u Royal Son Lapang uba ioh ia ka takma rupa ha ka kyrdan ialehkai 48-51kg bad Labiangliang Thawbri uba ioh ia ka takma rnong ha ka kyrdan ialehkai 71kgs.
Ka Thailand ruh ka dei kawei na ki Ri ka pyrthei kaba la wan iashimbynta ha kane ka Manipur Sangai Festival 3rd Amateur Muay Thai Championship 2022.
