Baghmara, Jylliew 22: Ka thain Siju bad ki hynriew tylli ki Shnong ka South Garo Hills, kim pat lah satia ban ioh ia ki lad jingiarap mynta la hynriew sngi naduh ka jingshlei um bad jijgtwa khyndew ba jia ha ka 17 tarik Jylliew bad wat ki helicopter jong ka Indian Air Force (IAF) kim shym la lah ban rung sha kane ka thain ban pynpoi marbam mynta la lai sngi lynter namar ka jingbym ailad ka mariang.
Ka jingsniew ka mariang ha South Garo Hills hynne ka sngi Balang sa shisien kala khang lynti biang ia ka jingleit ai jingiarap jong ka IAF kaba la phah ia lai tylli ki helicopter ban pynpoi marbam ha Siju, Mahadeo, Kanai, Bonbera, Rongsu Agal bad Kalu Songmong, kiba la dkut shisyndon na ka jingiasoh bad ka Jylla namar ka jingtwa khyndew bad jingshlei um.
Hynrei, ki shipai IAF kila lah ban hiar biang tang ha ka thain Maheshkola, jong ka South West Khasi Hills bad pynhap ia ki marbam ba 1200 kilo.
Ki shipai IAF kin sa pyrshang biang lashai ka sngi ban pynpoi marbam sha ki jaka jong ka South Garo Hills kiba la don mynta hapdeng ka jingkyrduh marbam.
Ka IAF naduh hynnin ka sngi kala lah ban pynpoi ia ki marbam tang ha Maheskola, South West Khasi Hills lyngba ki lai tylli ki helicopter bala phah na ALG Station na Upper Shillong.
Ka IAF kala pynpoi haduh 2.4 ton ki marbam ha kane ka Shnong jong ka South West Khasi Hills.
