Shillong, Naiwieng 23 : U Myntri Rangbah ka Jylla Conrad K Sangma ula ialam ia ka Kynhun Myntri hynne ka sngi Balang bad iakynduh ia ki bahaiing hasem jong ki 5 ngut ki briew kiba kyllon iap ha ka jingther kuli ki Pulit Assam hynnin ka step sngi Ba-ar ha Mukroh, West Jaintia Hills District.
Ia u Myntri Rangbah la synran da u Symbud Myntri Rangbah Bah Prestone Tynsong, u Myntri PHE Bah Renikton Lyngdoh, u Myntri pynroi sor ma Sniawbhalang Dhar bad Myntri Social Welfare ma Kyrmen Shylla.
U Myntri Rangbah ula leit iakynduh ia ki Kurim bad ki Khun ki kti jong kine kiba iap bad aiti ia ka song jingiarap da ka cheque kaba mar T. 5 lak.
Today we also handed over the ex gratia of ₹5 Lakhs each to the next of kin of the 5 deceased during our visit to Mukroh.
Pained to see their suffering. We stand with them during their time of grief and will do everything we can to ensure justice is served.@AmitShah pic.twitter.com/k7TlcE9fMy
— Conrad Sangma (@SangmaConrad) November 23, 2022
Haba iakren bad ki bahaiing hasem, u Myntri Rangbah ula pynpaw ia ka jingsngewlem na ka bynta ki nongshongshnong ka Jylla.
Ula pyntip ruh ha ka jingialang bad ki paidbah ba ka Sorkar Jylla kala rai ban pynsangeh shuwa ia baroh ki prokram jong ka Sorkar bad ki tamasa ban pyni ia ka jingiadon ryngkat bad jingsngewsih lem bad ki paidbah ka shnong Mukroh.
Ha kane ka jingleit jong u ha kane ka Shnong, u Myntri Rangbah ula sangeh ruh ban iakren bad ki Kynhun Sengbhalang bad kular ha ki ba ka Sorkar kan pynthikna ba kine ki lanot kin ioh ia ka jingbishar kaba hok. Ula pyntip ba ka Sorkar Jylla bad ka Assam kila mynjur ban kyrpad ia ka Sorkar India ba kan phah tohkit da ka NIA ne CBI halor kane ka jingjia, kaba la shim jyndat ia ka mynsiem ki 5 ngut ki riew paidbah bad uwei u forest guard ka Assam.
U Myntri Rangbah ula pyntip ruh sha ki kynhun ba iakhih ba ka Sorkar Assam kala ai ka jingiatreilang ba pura bad ka Meghalaya haba pyntip ba ki Ophisar ba donkti kynthup naduh u OC, u Forest Officer kila shah sospon bad u SP ka West Karbi Anglong ula shah pynkynriah kam na ka District.
Nalor kane, ula pyntip ba ka Kynhun Myntri kan sa leit iakynduh ia u Myntri kam Pohiing ka Ri u Amit Shah ha ka 24 tark Naiwieng ha Delhi, ka ban sa bud pat da ka jingiakynduh ia u Myntri Rangbah ka Assam u Himanta Biswa Sarma.
Ha kane ka sngi, ka Jaintia Students Union kala aiti ruh ia ka dorkhas ha u Myntri Rangbah da dawa ia ka Police Outpost ha Mukroh.
U Myntri Rangbah ula pyntip ba ka Sorkar Jylla dang shen kala pynkha ia ka Police Outpost ha Barato bad shen yn sa pyntreikam noh ia ka. Ula ong, ba un sa nang iakren ruh halor ka jingdawa kaba la pynsngew da ki paidbah jong ka thain ban buh ia ka Outpost ha Mukroh.
Hadien kane, u Myntri Rangbah lem bad ki Myntri Sorkar kila pynlong ia ka jingiasyllok bad ki kynhun bapher bapher na kane ka Shnong. Ki Nongshongshnong kila pynpaw iala ki jingsngewkhia bad pyntip ha u Myntri Rangbah ia ki jingeh bapher bapher kaba ki iakynduh manla ka sngi ha ki snem bala leit noh ha khappud ka Assam-Meghalaya.
U Myntru Rangbah ula kuklar ba ia kine ki jingpynsngew baroh jong ki paidbah ka thain, yn sa rah pynsngew sha ka Ministry of Home Affairs ba kan leh eiei.
