Tura, Naiwieng 23 : Ki Pulit ka East Garo Holls kila kem ia uwei u samla ba 22 snem uba la pynrit mynsiem iala ka Kmie bad u Kpa da kaba kam ba ula shah rahbor bad hap siew haduh T. 25 lak.
Une u samla ba kyrteng u Azad Ali uba dei na ka thain Krishnai, Goalpara, Assam, ula suhbuit dalade ban kam shah rahbor, da kaba jah rngai naduh ka 18 tarik mynta u bnai na lynti sha Songsak Dagal, East Garo Hills.
U Kpa uba dei u nongkhaii na Krishai, Assam, ula ioh ia ka phone call na ka phone jong u khun ha kaba u briew bym lah ban sngewthuh sur, ula dawa pisa T.25 lak ban pyllait ia une u samla.
Une u samla ula iathuh ha Iing ba un leit sha ka thain Dagal ha Songsak ban thied sying bad sohmarit na ka bynta ban khaii sha Assam.
Ki Pulit na Assam kila pyntip sha ki Pulit ka East Garo Hills halor kane ka jingjia bad ha ka jingkhynra bala pynlong ha kylleng ki jaka, kila shem ba une u samla ula suhbuit hi dalade ban shah rahbor.
Ki Pulit kila kem ia lai ngut kiba iasuhbuit lang na kylleng ki jaka ka Songsak Dagal kynthup ia uwei uba dei u trai shnong, kiba hadien pat kila pyntip ia ka jaka ba don u Azad.
Ki Pulit kila lap ia u Azad Ali ba ula shong aram ha kawei ka Iing ha Guwahati, kaba ula thmu ban sah tad haduh ka jingsiew pisa da ki kmie kpa.
