Guwahati, Naiwieng 23 :Ha ka jingpynpaw kaba nyngkong halor ka jingjia shah ther kuli hapoh khappud ka Assam – Meghalaya kaba la shim ia ka jingim jong ki hynriew ngut ki briew kaba kynthup ia u forest guard na Assam, na ka liang u Myntri Rangbah (CM) ka Assam u Himanta Biswa Sarma ula ong ba ki pulit ka Assam ki la dei ban shim ia ki sienjam ban kham kiar na ka jingiakynad kaba la lam sha ka jingjia ba sngewsih kaba la jia hynnin ka sngi ba Ar.
“Kane ka jingjia ha khappud ka Assam bad Meghalaya kam dei satia ka mat jong ka jingiakynad pud.Katto katne ngut ki briew ha ki bynta jong ka jaka khlaw kila leit ban pom dieng bad thep ia ki hapoh ka trok.Hadien ba kila wan poi ha kane ka jaka ki bor pahara khlaw ka Assam kila pyrshang ban lapdien ia kane ka trok kaba la phet krad noh na kane ka jaka bad kaba la pynlong ia ki bor pahara ba kin ther kuli ia katei ka trok.
Hadien ka jingbeh thong, laingut ki briew kila shah kem noh hadien ba la ioh ban pynieng ia kane ka trok hapoh ka shnong Mukroh.Ki nongshong shnong hadien ba kila ioh sngew ia kane ka khubor kila wan ha ryngkat ka jingbitar.Hadien ba ki bor pulit na Assam kila wan poi hapoh kane k shnong na ka bynta ban pynkynriah ia kane ka trok kala mih kynsan ka jingiakynad hapdeng ki ar kynhun.Hadien ba la bishar bniah, Nga ngeit ba ki pulit kila dei ban shim ia ki lad ban kham kiar.La iohi ruh ba kadei ka jingther kuli kaba khlem da bishar bniah halor ka jinglong jingman.Ki pulit kila dei ban kham kiar namar ka jingduh ei jong ki santylli ki mynsiem briew kalong kaba pang mynsiem shibun,” ong u CM ka Assam u Himanta Biswa Sarma haba kren sha ki lad pathai khubor mynta ka sngi.
Nalor kata u CM ka Assam ula ong ruh ba ka kynhun myntri kala hukum ban pynlong ia ka jingtohkit da u nongbishar kumjuh kumba la kyrpad lyngba ka tnat CBI lane NIA halor kane ka jingjia shah ther kuli ha khappud ka Assam bad Meghalaya.
“Katto katne ki heh pulit kila shah sospin, katba ia u SP la pynkynriah noh. Ka sorkar jong ngi kan shim ia baroh ki lad jingpynshitom bad ban pynkloi katba lah ha kaba iadei bad kane ka phang,” ong shuh shuh u CM Sarma.
Lah ban kdew ruh ba na ka liang ka sorkar Assam kala shim ia ka ria ban ati ia ka jingtohkit ha ki central agency.
Kham hashwa, kata hynnin ka sngi ka sorkar Assam kala hukum ban pynlong ia ka jingtohkit halor kane ka jingjia da u nongbishar ba la shongthaitka Gauhati High Court.
