Shillong, Naiwieng 22 : U Myntri Rangbah ka Jylla Conrad K Sangma ula pyntip ba ka Sorkar Assam kala sospon ia u Officer in Charge ka Zirikinding Police Station uba donkti ha ka jingther kuli sha ki paidbah ha Mukroh lem bad ia u Forest Range Protection Officer uba don bynta ha kane ka jingjia.
U Myntri Rangbah ula pyntip ruh baka Sorkar Assam kala pynkynriah kam ia u Superintendent of Police ka West Karbi Anglong namar kane ka jingjia ha Mukroh.
U Conrad u pyntip ba ula dep ban iakren bad u Myntri Rangbah ka Assam u Himanta Biswa Sarma uba la pyntip ba ka Sorkar Assam kan sa shim ia ki sienjam ba donkam ban shim ha kaban tohkit ia kane ka jingjia ha ryngkat ka jingiasyllok lang bad ka Sorkar Meghalaya.
“Ka Sorkar Assam kala ai ka jingkular ba kano kano ka jingdawa jong ka Sorkar Meghalaya bala buh hakhmat ka Sorkar India, ka Sorkar Assam kan ai ka jingiatreilang ban pynthikna ba kan don ka jingbishar ba hok bad ba kito kiba donkti kin ioh ia ka jingpynsajia” ula pyntip.
