Nongpoh, Naiwieng 22: Ka Synjuk ki Rangbah Shnong Ri Bhoi District kala pynrem jur ia ka jingther kuli jong ki Pulit Assam ia ki riew paidbah ha Mukroh, West Jaintia Hills kaba lam sha ka jingiap haduh 5 ngut ki briew haba dawa ruh ia ka Sorkar Jylla ba ka dei ban pyllait noh ia ka jingtreikam ki kor Internet.
Ka SKRS kala shim ia kane ka rai ha ka jingialang jong ka Executive Committee ba long hynne ka sngi bad ka Synjuk kala dawa ia ka Sorkar Meghalaya baka dei ban phah noh ia ki bor pulit ba khlain sha ki jaka khappud ban shong shngain ki paidbah kiba sah ha khappud.
Haba kren bad ki Nongthoh Khubor, u Bah PB Sylliang, Secretary ka SKRS, Ri Bhoi District, u la ïathuh ba ha kane ka jingïalang, ka Synjuk kala pynpaw ia ka jingsngewkhia kaba jur halor ka jingpynduh ia ka Internet ha ki 7 tylli ki District tang namar ka jingjia ha ka shnong Mukhroh bad kane ka la ktah shikatdei pat ia ki paidbah khamtam ki samla pule kiba dang pynkhreh ia ki eksam bapher bapher.
“Ka Synjuk ka kyrpad ia ka sorkar jylla ba kan pynjynsur noh ia ka jingpynduh Internet hynrei ha ka jaka bad ban pynbeit noh mardor bad ka Assam ia ka jingiakajia pud kumba leh kiwei ki Jylla kum ka Manipur, Nagaland bad Mizoram” ula ong.
U Bah Sylliang u la iathuh ruh, ba ka synjuk hi ka la kyntu ia baroh ki paradoh parasnam ban ia long kiba ia tylli bad ban nym long pat kiba khluit biej ha kaba ia dei bad ka jingjia ka la jia ha ka shnong Mukhroh khnang ban lait na kino kino ki jingjia kiba sngewsih kiba lah ban bteng ha kine ki sngi namar kan ktah ruh ia ka shongsuk shongshngain ha ka jylla.
Ula kyntu jur ia u Superintendent of Police bad u Deputy Commissioner ba kin shimkhia ban peitngor ha kaba ia dei bad kine ki jingjia ba sngewsih ha ki shnong khappud bad ruh ban peitngor ia ka shong suk shongshngain.
Ha kajuh ka por, une u Nongialam ka Synjuk u pyntip ba kane ka jingialang kala ïa kren ruh halor ka jingpynshai ba la ïoh na ka Khasi Hills Autonomous District Council halor ka jing bthah ïa ka Hima Mylliem ban ai NOC ïa kiba thmu sengkam sengjam kum ki hotel, wine shop bad kiwei kiwei tad ynda ïoh ïa ka NOC na ka Synjuk ki Rangbah Shnong.
U la iathuh ruh, ba na ka liang ka SKRS ka la shim ruh ia ka rai ban pynkup burom ia ki samla ialehkai kiba la lah ban wanrah ia ka nam ka burom ia ka Ri Bhoi District lyngba ki takma ba la ioh khur na ka 2nd North East Olympic kaba dang shu kut shen ha nongbah Shillong bad kumjuh ruh ia ka Kong Margret Pathaw kaba la ioh ban khur ia ka takma ksiar na ka lympung ialehkai World Arm Wrestling Championship kaba la long ha Turkey.
Ia kane ka jingialang pynkup burom yn sa pynlong ha ka 10 tarik u Nohprah ha Nongpoh.
