Nongpoh, Naiwieng 21: Ka Tyrso Valley Wildlife Protection Society (TVWPS) kala pynpaw ba ka jingwan jong ki sim Amur Falcon manla u snem hapoh ka shnong Tyrso, Ri-Bhoi District, kala wanrah ia shibun ki jingmyntoi ia ki paid nongrep.
Ia kane la pyntip da u Bah Alos Nongpoh, General Secretary ka Tyrso Valley Wildlife Protection Society haba iakren bad Ka Shlem ha ka jingialang pynhap pyrda ia ka Amur Falcon Festival hynne ka sngi nyngkong ha shnong Tyrso.
Kat kum ka jingong jong u, ka jingwan kine ki Sim kala iarap bha ia ki nongrep ba kin ioh kheit kham bun ia u soh ka jing trei shitom namar kine ki sim kila bam ia ki khniang kiba thmu ban pynjulor ia ki jingthung jingtep.
“Kine ki Sim kila wanrah ruh ia ka roi ka par ha ka thain khamtam ka jingwanrah ia ka surok rong kaba la pynsuk shibun eh ia ki paidbah ha ka leit ka wan da ka jingwan ki nongjngohkai pyrthei kiba wan peit kai ia kine ki sim” ula ong.
Haba pyntip ba ka jingpynlong ia ka tamasa ka long ban pynneh pynsah ia kine ki sim kiba wan manla ka aiom synrai ha Tyrso, u Bah Alos ula ong “Ka jingwan ka khlam Covid kala khanglad ban pynlong ia ka tamasa haduh arsnem hynrei sngew kmen ba mynta kane ka tamasa kala iaid biang shakhmat”.
U Bah Alos u pyntip ba kine ki sim ki ju wan poi manla u snem ha ka 15 tarik u Risaw ha shnong Tyrso bad ki ju sah haduh shibnai ne shibnai tam shuwa ban her noh sha kiwei ki jaka.
Haba kylli, une u Nongialam ka TVWPS ula iathuh ba ka jingiarap jong ka Sorkar ban pynlong ia kane ka tamasa ka long tang hapoh ka 30% eiei.
“Ngi kyrpad ia ka Sorkar ba kan phaikhmat lem sha ka tamasa kumba phaikhmat sha kiwei pat ki tamasa kiba don hapoh ka Jylla namar ha kane ka Jylla, tang kane kawei ka tamasa kaba iadei bad ki Sim bad kaba ialeh ruh kumno ban iada ia kine ki sim kiba la jan duhjait” ula ong.
Kane ka kynhun mynta u snem ka la ioh ban pynlong iaka tamasa Amur Falcon kaba 6 ia kaba la sdang ha ka 18 tarik Naiwieng bad la pynkut pat haka 19 tarik Naiwieng 2022.
