Nongpoh, Naiwieng 22: Ka Tyrso Valley Wildlife Protection Society kala pynhap pyrda noh iaka Mini Amur Falcon Festival kaba 6, kaba la pynlong ha madan ialehkai jong ka Shnong Tyrso.
Kane ka tamsa lehkmen ka dei kaba ju pynlong manla u snem kum shibynta ban ialap ia ki paidbah ba kin pynneh pynsah iaki sim kbeit kiba la tip kum ki Amur Falcon.
Ha kane ka tamasa na ka liang ki nongpyniaid ki la ioh ruh ban pynlong ia ki jingiakop bapher bapher na ka bynta ki nongshnong shnong jong ka thaiñ. Ha kane ka sngi pynkut la sam iaki khusnam sha ki nongjop ha ki jingiakop bapher bapher.
Ha kane kajuh ka sngi na ka liang ka TVWPS ki la pynkup burom ruh iaka samla Sara Ronghang kaba dei ka thei iakhun karate kaba la wan rahnam bad burom da kaba khur ia u takma ksiar ha North East Olympic Game kaba dang shu dep long ha nongbah shillong.
Ha katei ka jingpynkut iaka Mini Amur Falcon Festival kaba 6 la iawan ban ia don bynta lang da u Dr. Jemino Mawthoh General Secretary ka UDP uba la shim iaka bynta kum u kongsan haka jingiadon lang da u bah Baiahunlang Makdoh, kyrtong UDP Mawhati, Dr. Saralin Dorphang Kyrtong TMC Mawhati, u bah Rojen Sten, Sordar Tyrso Pyllun, Samla Banjop Maring, Education Secretary, KSU NKHD bad kiwei kiwei
Haba ai jingkren, u Bah Jemino u la pynpaw ia ka jingsngew nguh ia ka kynhun TVWPS kaba la pynlong ia kane ka tamasa bad kumjuh ruh iaki nongseng jong katei ka kynhun da ka jingthmu ban iada ia kine ki Kbeit. U la ong ruh “lyngba ka jingiohi jngai jong ki nongialam jong ka TVWPS ngi ngeit ba hadien 60 snem ruh ngin dang ioh ban pynlong ia kane ka tamasa”.
U Bah Jemino u la pynsngewthuh ia ki paidbah ba ki jingthung ki jingtep bad ki mrad ki mreng kidei ki jingthaw ba la ai sngewbha da u Blei bad ngi kum ki briew ngi dei ban sngewthuh bha ia kane bad ngim dei ban pynjot lane pynduh jait iaki.
“Lada ka jylla ka jong ngi ka la long lypa kaba riewspah haka mariang, hynrei kaei pat ka bynta jong ngi ban ai kylliang iaka mariang” ula ong.
