Shillong, Naiwieng 19: Ka kurim jong u Lat ka jylla ka Neelam Mishra hynne ka sngi Saitjaiñ kala leit ban jurip iaka Vocational Training Centre jongka 101 Area kaba don ha Happy Valley.
La pdiang sngewbha iaka Neelam da ka Sunitha Panchanathan kaba long ka Zonal President, Army Wives Welfare Association (AWWA) 101 Area.
Ha katei ka jingjurip, ka kurim jong u Lat kala iakynduh bad iakren bad ki kurim jong ki shipai.
Haba kren haka jingialang kaba la wan ban iashimbynta da bun ngut ki longkmie, ka Neelam kala kyntu iaki paidbah ba kidei ban pynneh pynsah bad ban kyntiew ia ki kam thaiñ jingthaiñ tynrai kiba la tip kum ki Traditional Loin Loom Weaving jongki paidbah ka thaiñ shatei lammihngi jong ka ri.
“Ki jingthaiñ tynrai ki don tang ha ka Thaiñ shatei lammihngi mynta. Ngi dei ban ialeh ban shimkhia ha kaban pynneh pynsah bad ban pynshlur ia ki nongshong shnong kiba thaiñ jaiñ ba kin iai bteng ia katei ka kam jongki” ong ka Neelam bad ka bynrap ba kiba bun hi ki nongthaiñ jaiñ kidei ki longkmie.
Kala ong, ka Loin Loom Weaving kadei ruh ka jingpynkup bor ia ki kynthei kaba pynthikna ban kiew ha ka ïoh ka kot bad karoi ka par jong ki paidbah bad kala banjur ba ia ki mar ki mata ne ki tiar ki tar tynrai kiba pynmih da ki nongthaiñ jaiñ ka Thaiñ shatei lammihngi dei ban pyniaid ïew shabar jong ka ri.
Ha kane ka sngi, la pyni ruh iaka documentary film halor ka Loin Loom Weaving kaba la pynwandur hi da ka kurim jongu Lat ka jylla.
