Dimapur, Naiwieng 16 : Ka Nagaland Pradesh Congress Committee (NPCC) kan pynlong ia ka jingiaid paidbah ba la tip kum ka ‘Bharat Jodo Yatra’ ha ka 19 tarik mynta u bnai shibynta ban rakhe ia ka lyngkhuh sngi kha jong ka Myntri Rangbahduh (PM) barim ka Indira Gandhi.
Haba pyntip ha ka jingialang bad ki lad pathai khubor hapoh Congress Bhavan, ha Dimapur hynnin ka sngi ba Ar, na ka liang u joint coordinator ka NPCC u Rajesh Kumar Sethi ula ong ba kane ka jingiaid paidbah kan sdang napoh DC Court Junction, Dimapur, ha ka por 7 baje mynstep ha ka 19 tarik mynta u bnai bad pynkut hapoh Chumukedima gate ha ka por janmiet, kata hadien ka jingiaid kaba jngai kumba 20 kilomitar.
Ha kane ka sngi ki nongialam ka seng Congress kin ai ia ka jingkren ha ka jingialang hadien ba kin sangeh ia kane ka jingiaid ha ki lai jaka, kata hapoh Supermarket bad 4th Mile bad ha ka jaka pynkut hapoh Chumukedima.
Nalor ki nongialam ka NPCC, u general secretary ka AICC uba dei ruh u incharge jong ka Nagaland, u Janajit Mukherjee un iashim bynta lang ha kane ka jingiaid paidbah.
U Sethi ula ong ba yn pynlong ia kane ka jingiaid paidbah halor ka mat “Iada ia ka Nagaland, iada ia ka ri” kata ia kaba la pynkhreh ha ka por ka jingpynlong ia ka ‘Bharat Jodo Yatra’ ba la lamkhmat da u nongialam ka seng Congress u Rahul Gandhi ban pynpaw ka jingiatylli bad ka jingieit bad shibynta ban pynpaw pyrshah ia ki polisi ba pyniapaid jong ka seng BJP.
Nalor kata ula ong ruh ba la pynlong ia kane ka jingiaid paidbah ha ki bynta bapher bapher jong ka ri ym na ka bynta ki daw sain hima sima hynrei ban pynkut noh ia ki polisi jong ka jingpyniapait iapra jong ka seng BJP.
Nalor kata na ka liang u NPCC secretary (org) bad joint coordinator u Akavi N Zhimomi ruh ula ong ba kane ka jingiaid paidbah ka long kaba donkam ban pyniatylli ia ki paid nongshong shnong kiba dei na ki kynhun bapher bapher ha ka por ba ka BJP kala pynkylla sain hima da kaba pyniapait iapra ia ka ri.
Ha kajuh ka por u kyntu ruh ia baroh ki nongshong shnong ba kin wan pyniasoh lang ha kane ka jingiaid paidbah khnang ban iada ia ka Nagaland bad ia ka ri hi baroh kawei.
