Shillong, Naiwieng 12 : U President ka Bharatiya Janata Party (BJP) Bah Ernest Mawrie hynne ka sngi saitjain, ula wer ia ki paid nongshongshnong ka Jylla ba kin ‘boycott’ pura ia ka All India Trinamool Congress (AITC) ha Jylla.
U Bah Ernest ula kren ia kane haba pynrem ia ka jingkren u Myntri ka TMC u Akhil Giri pyrshah ia ka President ka India ha ki kyntien kiba khor bha.
“Ka Droupadi Murmu kala thaw histori da kaba long ka President ka Ri India ba nyngkong eh na ki riewlum. Ka dei ka nuksa ia ki million bad kala ai jingkyrmen ia ki paid riewlum ba sah ha ka Ri. Hynrei, u Akhil Giri Myntri ka TMC, ula pynhiar kyrdan ia ka da kaba kynthoh halor ka dur ka dar jong kane ka President. Ula buh jingkylli “Kumno ka dur ka dar ka long jong ka President” ka phalang ia ka jingjaboh ka jingmut jingpyrkhat jong u” ong u Bah Ernest ha ka kyrwoh.
U Bah Ernest ula niew ia kane ka jingkren kum ka kam bymman bad kaba long pyrshah ia ki paid riewlum hapoh ka Ri. Ula buh jingkylli ia kaei ka jingthmu jong une u Nongialam ka TMC ia ki paid riewlum ka Jylla ruh.
Ula ong ba lada ki don ia kum kane ka jingmut pyrshah ia ka President ka Ri tang namar ka dei ka riewlum, kumno kin khein ia ki paid riewlum jong ka Jylla kiba dang iaksaid namar ka jingduna ka roi ka par.
U Bah Ernest ula wer ban ‘boycott’ pura ia ka TMC da ki paid riewlum ka Jylla bad ki Nongshongshnong ka Jylla baroh kawei.
