Shillong, Naiwieng 12: Ka Mizoram kala ioh ban khur ia ka takma ksiar ha ka jingialehkai Table Tennis jong ki shynrang bad ki Kynthei ha ka 2nd North East Olympic Games 2022, kaba long ha NEHU Indoor Hall ha ka miet sngi thohdieng.
Ka Mizoram kala don ha tmier ka jingshah rem ha baroh artylli ki jingialehkai phainal jong ki Shynrang bad ki Kynthei haba iakhun pyrshah ia ka Manipur hynrei da ka jingiakhun dohiap, kine ki kynhun ialehkai ka Mizoram kila ioh ban tam bad ioh syndon ia ka jingjop.
Ha ka jingiakhun ki shynrang, ka Manipur kala tam da 2-0 ia ka Mizoram kaba la kthong nadien ban ioh pat ia ka jingjop da 3-2.
Kine ki artylli ki Jylla kila iakynduh ruh ha ka phainal jong ki Kynthei ha kaba ka Mizoram kala kthong nadien ban ioh ia ka jingjop.
Ka Mizoram kala rah ia ka takma ksiar bad ka Trophy ia kaba la aiti da u President ka Meghalaya State Olympic Association Bah John F Kharshiing.
Ki kynhun ba shah rem ha ki semi phianal ha ki jingiakhun ki shynrang bad kynthei kila ioh ia ka takma rnong bad kine ki dei ka Nagaland bad Meghalaya ha ka jingialehkai ki shynrang bad ka Meghalaya bad Tripura ha ka jingialehkai ki Kynthei.
Ki jingialehkai jong ki rang bad ki thei ialehkai shimet (individual) kan long mynta ka sngi saitjain.
