SHILLONG, Naiwieng 09: Ka seng Hynniewtrep Youth Council (HYC) hynne ka sngi kala pynbna ban pynlong daka jingiaid paidbah haka 10 tarik mynta u bnai naduh Madan Iewrynghep shaduh Additional Secretariat ban dawa pyllait noh ia ka bai bam lane ka Scholarship ki samla pule jong u snem 2021-2022.
Haba kren sha ki lad pathai khubor u education secretary u samla Enlang Sawian u la ong ba kane ka jingiaid paidbah da ki samla pule kan dei daki khynnah bad samla pule na kylleng ki skulbah bad kolej na kylleng ka jylla Meghalaya.
U samla Enlang u la ong ba dang shen ka seng HYC kala ai por iaka sorkar jylla ban pyllait noh iaka Scholarship hynrei haduh mynta kam shym la don kano kano ka sienjam ba ka sorkar ka shim ban pyllait noh iaka Scholarship.
“Dang shen naka liang u Myntri Rangbah ka jylla u Conrad K Sangma bad u Myntri ka that pule u bah Lahkmen Rymbui kila pynpaw sha ki lad pathai khubor ban pyllait noh ia ka bai bam lane la Scholarship hynrei haduh mynta kane ka jingkular kala paw ba dei ka kular thok iaki samla pule” la ong u samla Enlang.
U samla Enlang u la ong ba naka liang ka seng kala pan jingbit naka ophis Deputy Commissioner (DC) ban pynlong ka jingiaid paidbah hynrei haduh mynta ka seng kam pat ioh satia iaka jubab halor ka jingpan jingbit.
U la ong ba ka seng ka don daka jingthmu ka ba bha bad ka ba jai jai ban pynlong iaka jingiaid paidbah bad kan bud ruh iaki kyndon ki bor district bad dei namar kane ka seng ka iaid bteng beit iaka jingiaid paidbah wat lada kam ioh jingbit naka ophis DC.
“Kane ka jingslem ka sorkar jylla ban pyllait iaka bai bam lane ka Scholarship jong u snem 2021-2022 ka buh jingeh iaki samla pule khatam kito kiba wan naka longing ba duk bad dei namar kane ka seng ka ieng beit haka rai ban pynlong daka jingiaid paidbah ban pynsngew iaki jingeh ba ki samla pule ki kynduh namar ka jingleh mynthi ka sorkar” la ong u samla Enlang.
