Shillong, Naiwieng 09 : Ka Iingkashari Meghalaya High Court kala dep ban pyndait mynta ki kor ban pyntreikam mynta ia ka live streaming ( pyni ia ka jingshimbishar lyngba ka jingring video) ia ki mukotduma hapoh ka Iingkashari ka ban leh lyngba ka Youtube Channel.
Kane ka jingpyndait ia ki kor ring video ka dei kaba la pyntreikam kat kum ka Meghalaya High Court ( Live Streaming of Court Proceedings) Rules 2022 bala pynmih jingpynbna ha ka 17 tarik Risaw 2022.
Ka Iingkashari kala don bun rukom ka rukom treikam ha kaba ki nongiakhun mukotduma ki la lah ban jied ha ka ban wan hi sha Iingkashari haba don ka jingbishar ia ka mukotduma ne ban sngap ia ka jingbishar lyngba ki kor ring video na kano kano ka jaka ba ki don bala tip kum ka video conferencing ia baroh ki Iingkashari.
Kat kum ka kyrwoh na u Registrar General ka Iingkashari, la ong ba ki Nongiasaid Ain, ki Nongiakhun mukotduma kila lah ban jied ban iashimbynta ha ka jingtian bishar ia ka mukotduma da kaba wan hi marmet sha Iingkashari ne da ka kor video.
Ka Iingkashari ong ba kane ka jingpynbun ia ka rukom treikam kala weng noh ia ka jingbym lah ban ioh ia ka jingbishar kaba hok namar ka jingjngai, ka lait na ka jingpynsyrwa ia ka por bad ka pynduna ruh ia ka jingpynjlan (adjournment) na ka jingpan por jong ki nongiasaid ain halor ka nongrim ba kim lah ban wan poi sha Iingkashari namar ka jingdon mukotduma sha kiwei pat ki Iingkashari.
Ka Iingkashari ka pyntip ba kane ka jingshim bishar ba lah ban iashimbynta lyngba ka video conferencing kala sdang treikam naduh hynne ka sngi Balang ka 9 tarik u Naiwieng 2022.
Ula pyntip ba kane ka jingpyni ia ka jingbishar mukotduma lyngba ka video lah ban peit naka Youtube Channel ha kaba ia ka link la buh ruh hapoh ka website jong ka Iingkashari Meghalaya High Court.
Ka Iingkashari ka ong ba ki Nongiakhun mukotduma ne ki paidbah kim donkam shuh ban pynlut kai ia ka por baroh shisngi ban sngap ba kumno ka iaid ka jingshong bishar hynrei kila lah ban khmih ia ka jingbishar da kaba shong nala ki jong ki Ophis bad nala iing.
