Shillong, Jylliew 21 :Namar ka jingther kynsan jong u lapbah, ka Shillong Sports Association (SSA) kala hap ban pynsangehnoh shiteng ia ka jingiakhun Shillong Premier Leaque hapdeng ka Mawlai Sports Club bad ka Shillong Lajong hadien ba ka jingiakhun ka la dep ban iaid kumba 60 minit ei ei ha madan ialehkai Third Ground Polo.
Ha shwa ba yn pynsangeh shwa ia ka jingiakhun, ka Mawlai ka la ioh ban lamkhmat da 1-0 kol lyngba ka kol kaba la ioh ban thep da u Dondorlang Nongkynrih ha ka minit kaba 30 jong ka kylla step.
Ka jingkylla ka suinbneng ha ka kylla miet kaba la dum kynsan bad bteng da ka jingther jong u lapbah, ka la pynlong ia ki bor pyniaid ba kin ym banse shuh ban pynsangeh noh shwa.
Haba phai sha ka jingiakhun ha kitei ki minit shwa ban pynsangeh, dei ka Mawlai kaba kham ioh ban tehlakam ia ka jingialehkai la ka long haduh ka jingioh ban bat kham slem ia ka bol lane ha ka jingioh ban tur kham bunsien sha phyllaw kol jong ka Shillong Lajong.
Hynrei hapdeng ka jingiakhun, u Sangti Janai ka Shillong Lajong u la ioh teng ia ka kabu ksiar ha ka minit kaba 40 hynrei ka bol kaba u khyrwit ka la palat noh ia u dieng kol.
Katkum ki kyndon jong ka SPL, ki minit ba dang sah kaba long shiteng kynta yn sa pynkut ha ka tarik ban sa pynbeit da ka Shillong Sports Association.
Kumban shu kdew hangne, ka Mawlai ka la jop ha ka jingiakhun sdang da 2-0 kol ia ka Nangkiew Irat katba ka Lajong pat ka la mad ia ka nam rem da 1-0 kol ha ka Langsning.
Ka jingiakhun ha kane ka sngi Balang pat kan long hapdeng ka Langsning bad ka Nangkiew Irat ha ka por 4baje janmiet.
