Thep 80% ia ki Khasi haba lait kam ha Ri-lum Khasi bad 80% ia ki Garo haba lait kam sha Garo
Shillong Jylliew 21: Ka Hynniewtrep Youth Council (HYC) hynne ka 21 tarik u Jylliew kala dawa na ka sorkar jylla ba kadei ban pynkylla noh iaka Office Memorandum jong ka Reservation Policy kaba la pynmih haka 10 tarik u Jymmang 2022, da kaba bhah beit 80% ia ki Khasi-Jaintia haka jingthep kam ha rilum Khasi bad ban mang beit 80% ia ki Garo haka jingthep kam ha rilum Garo.
Ka HYC bala ialam da u President Bah Robert Kharjahrin kala buh ia kane ka jingdawa hakhmat u Symbud Myntri Rangbah ka Jylla Bah Prestone Tynsong bad pynpaw ia ka jingsngewkhia halor ka kyndon F jong ka Office Memorandum kaba batai shai kumno ban pynkhreh iaka Roster System ha ka thungkam thungjam lyngba ka Reservation Policy ha ki tnad sorkar bapher bapher, ki Directorate bad ki District bapher bad ki Sub Divisional.
“La kdew ba ia ki post kiba don ha ki District ne Sub Divisional ki bym don ka jingpynkynriah kam na kawei ka district sha kawei pat, kum ka Grade III & IV kaba pynlong da ka DSC ne da ki tnad sorkar kiba don ha kitei ki District, ba ha ka jaka ba kan don ka jingbhah 40:40 ia ki Khasi Jaintia bad Garo, dei ban don beit noh 80% kata ha rilum Khasi, ki Khasi bad ki Jaintia kidei beit ban ioh 80% katba ha rilum Garo, ki Garo kidei ban ioh beit 80%” ong u Bah Kharjahrin.
Hynrei u pynpaw pat “ Ngi iahap ia kane bad kadei ban long hi kumne, hynrei ka jingeh kaba mih haka Office Memorandum ka dei ba ki don ar tylli ki kyndon kiba kdew ba ha katei ka 80% dei ban ailad nyngkong eh ia ki nongshong shnong kiba pura bad kata ka 80% ha rilum Khasi kin ioh ruh ki Garo lada kim don ki Khasi –Jaintia kiba applai ia ka kam bad ia ka 80% ha rilum Garo kan treikam tang lada ym don u Garo uba applai”.
“Lada ngi kheiñ ia ki jinglong jingman jong ki District ha Jylla, ki Khasi kiba shong ba sah ha Ri-lum Garo ki duna bha hynrei ki Garo kiba shong bas ah ha Ri-lum Khasi Jaiñtia ki don da ki lak ngut la ka dei ha Ri-Bhoi, West Khasi Hills,South West Khasi Hills ne East Khasi Hills bad tang lada ki Garo kim applai kam yn lah ban ioh 80%” ong u Bah Robert Kharjahrin haba iakren bad ki nongthoh khubor.
U la ong, ki Garo kiba sah ha rilum Khasi kin applai kam beit hynrei ki Khasi ki bym dei ki nongshong shnong ba pura ha rilum Garo kin ym ioh ban applai kam bad ha kaba khatduh hi, ki Garo kin ioh 80% na ka 80%, katba ka hi rlum Khasi, ka jingbhah kam kan long beit 40-40 bad kane kan long ka jingduhnong kaba khraw ia ka jaidbynriew Khasi-Jaintia bad kane kan wanrah ia ka jingbym sngewtynnad.
“Baroh ngi tip ba ka Meghalaya Reservation Policy kadei kaba la noh shilliang lypa, ki paralok Garo ki don 8 lak tam bad ngi pat ngi don 13 lak tam hynrei la mang pat mar 40% ka bym don jingmut eiei. Ngi la dawa na u Symbud Myntri Rangbah ba udei ban pynbeit noh iaka Kyndon F ha kaba ula kular ban sa iakren bad u Myntri Rangbah ka jylla ryngkat bad ka Chief Secretary ka jylla kumno ban pynbeit noh ia kane” ong u Bah Kharjahrin.
Nalor kane, u la ong, ka HYC kala kdew ruh ha kaba iadei bad ka 7 (1), kaba la kdew ba ka Reservation Policy kan treikam ha ki jaka pule kiba la pyniaid da ki riewshimet kiba ioh jingkyrshan bad jingiarap naka sorkar jylla bad kiba bun hi kitei ki jaka pule kidei ki skul bad kam long kaba iahap ban thungkam 40% ia ki Garo ha rilum Khasi-Jaintia ne ban thungkam ia ki Khasi 40% ha rilum Garo bad kane ka wanrah iaka jingklumar.
“Ngi la kren da kaba shai iaka sorkar ba dei ban mang beit 80% ia ki Khasi-Jaintia ha rilum Khasi bad 80% beitia ki Garo ha rilum Garo kata lada ki applai ne kim applai, la kidei ne kim dei ki nongshong shnong ba pura jong ka district bad kum ka dak jong ka jingburom, ki Garo kiba sah ha rilum Khasi kidei ban leit applai kam sha rilum Garo khamtam haba ka rukom bhah kam kala noh shilliang lypa bad kumno u 8 Lak tam yn ioh ia ka juh bad u 13 lak tam” ong u President ka HYC.
