Nongpoh, Naiwieng 06: Ka Seng Samla Nongpoh Proper, ha ka sngi Saitjaiñ ka la ioh ban pynlong ia ka jingiakynduh lang jong ki khun samla ban rakhe ia ka jingjam jong ka Seng Samla sha u maw mer ba 32 snem ha ka jingiaid lynti ban shakri ia ka imlang ka sahlang ka thaiñ Nongpoh.
Haba kren bad ki nongialam u Samla Anthony Suchiang kum u President bad u Samla Herroi Nongrum, General Secretary, ki la pynpaw ia ka jingkmen ban ioh kynmaw burom ia ka sngi ba la seng ia ka Seng Samla Nongpoh (Foundation Day) bad ban kynmaw burom ruh ia u synñiang jong ki nongprat lynti naduh u snem 1990 ter ter, kiba hap ban thom ia shibun ki jingeh ban pynwan dur ia ka Seng bad ban lum ban lang ia ki khun Samla jong ka Shnong Nongpoh.
Ki la ong ruh, ba kane ka jinglum lang ia ki Samla ka long ruh kum shi bynta ban nang pynrhem ia ka ding hapoh ki dohnud jong ki khun Samla ban nang bteng ban iai trei shitrhem ban long lang kawei na ka bynta ban nang kyntiew ia ka nam ka burom ym tang ia ka Seng Samla hynrei kumjuh ruh ia ka shnong ka thaw hi baroh kawei.
“Kum ki samla kiba don ka jingkitkhlieh ban kyntiew ia ka imlang ka sahlang, ki dei ruh ban long kiba la kloi ban iarap i wei iwei pat khamtam ban peitngor ruh ia ki jingsniew kiba la sdang ban kynrei ha Nongpoh kum ki jingdih buaid bad kiwei kiwei ki jingsniew khnang ba ka shnong ka thaw hi kan long kaba shongsuk shongshngaiñ”, ong ki nongialam.
Ha katei ka sngi, kum ka dak ka jingialehkmen ki la ioh ruh ban ot ia u cake ha kaba la ia shimbynta lang da ki samla jong ka shnong Nongpoh, bad kum ka dak ka jingkyrmen ban dang lah ban ai ka jingshakri kaba janai ki la pynher ia ki Ding Sharak iaka ba la tip kum ka Sky Lantern.
