Nongstoin, Nailur 29 : U MDC ka Voice of the People Party (VPP) Dr Juristman Iawphniaw ha ka step Sngi Ba-ar, ula leit ban pynsangeh ia ka interview thungkam ia ki staff nurse ka
Tnad ka Koit ka Khiah na ka bynta ka Maternal & Child Health Hospital ha Nongstoin.
Kane ka Interview ka dei kaba la pynlong na ka bynta ban thungkam contract ia ki nurse ha kane ka hospital ka Sorkar.
Ka interview ka dei ia ki kyrtong kiba la shah jied hadien ka written exam bala dep ban pynlong ha ka 21 tarik Nailur. Ia kane ka interview la buh ban pynlong ha ka 29 tarik bad 30 tarkk Nailur.
Katba ka interview ka dang iaid hapoh ka conference room jong ka Ophis ka Deputy Commissioner, une u MDC ka Nongstoin ula leit rung hapoh ka kamra khlem da ai jingtip bad ula kynhied ia ki nongshim interview bad pynthut syndon ia ka kam.
Ia une u MDC la ialam noh sha ka kamra ka DC ban iakren bad ula pynmih ia ki jingkynnoh kiba long pyrshah ia kane ka Interview.
Haba iakren bad ka Shlem, une u MDC ula iathuh ba ka jingpynsangeh ia kane ka interview ka dei namar ba ki mih ki jing kynnoh ba don ka jingiabam pisa ne jingpan pisa ban ioh ia kane ka kam staff nurse.
Une u MDC ula dawa ba dei ban pynbeit shuwa ia kane ka kam (jingkynnoh bam pisa) hashuwa ban pyniaid ia kane ka interview thep kam.
Ula byrngem ruh ba kum u MDC un leit pynsangeh biang ia ka interview lashai ka sngi-ka 30 tarik Nailur, lada ki bor pyniaid ki pyniaid shakhmat ia ka kam.
