Nongpoh, 06 Naiwieng: Ka Seng Samla ka shnong Umsohpria ha ryngkat ki kynhun sengbhalang ba kynthup ia ka KSU, FKJGP bad RBYF, ki la ioh ban kurup ia bun bah ka Kyiad Pyrsi, na kawei ka kali kaba wan na ki thain Sohiong.
Ka tyllong khubor kaba la iohlum, kane ka jingjia kala jia ha ka miet sngi thohdieng bad la ioh bat ia kane ka kali da ka jingioh jingtip ba thikna ia ka jingwan jong kane ka kali kamai ML-05-U-4988, kaba la mih na ki thain Sohiong ban pynpoi ia ka Kyiad Pyrsi sha ki thain Umsohphria.
Ki Dkhot ka Seng Samla bad ki Sengbhalang kila pynlong ia ka jingapshrip ha shnong bad haba kane ka kali kala wan poi, kila pynlong ia ka jingtalasi ia ka kali bad lap da ki spah liter ka kyiad pyrsi.
Hadien ka jingtohkit, ia kane ka kali bad ka kyiad pyrsi la aiti noh sha ki Pulit ka Patharkhmah Police Outpost ba kin leh ia kaba donkam.
