Shillong Naiwieng 04: U President barim ka Federation of Khasi Jaintia and Garo Peoples (FKJGP) Bah Wellbirth Rani ryngkat u President ba mynta Bah Dundee Cliff Khongsit, hynne ka sngi Thohdieng, kila plie iaka ophis treikam jong ka seng kaba don ha Mawlai Kynton Massar.
Ha kane ka jingplie iaka ophis la iadonlang u CEM ka KHADC Bah TW Chyne uba long u Publicity Secretary barim ka seng, ki President barim ka FKJGP kiba kynthup ia u Bah Sounder Strong Cajee, Bah Joe Marwein, Bah Emlang Lyttan, ki nongialam ka seng KSU, HNYF, RBYF, JSU bad kiwei kiwei.
Ka seng FKJGP kala ioh iaka ophis treikam kaba dang shu dep tei thymmai hadien 33 snem jong ka jingiaid lynti ka seng bad lyngba ka jingnoh synniang jong ki 35,000 ngut ki dkhot kynthup ruh na ki nongai sngewbha la lah ban tei pyndep hapoh ka 8 bnai ia kane ka Ophis treikam ba lai mala.
U bah Wellbirth Rani ula ong, ka jingplie iaka ophis kadei ka jingangnud kaba la slem jong ka seng bad ula iathuh ba ha ki por kiba mynshwa haba ka seng kam don iaka ophis treikam, kila hap ban pynlong ia ki jingialang ha ki ïing sah jong ki President.
Ula ong, ka jingdon ka seng iaka ophis kala nang pynskhem shuh shuh iaka nongrim jong ka FKJGP kaba la iaid 33 snem hynrei kan shong pat ha ki nongialam kumno ba kin pyniaid shakhmat iaka seng.
“Kane ka ophis treikam kadei ban iatai bad shim ia ki rai halor ki ishu jongka jaidbynriew bad ban saindur ia ka lawei jong ka jaidbynriew” ula ong.
“Kane ka ophis kadei ban rai iaka ishu jongka ILP balei ka sahkut sah balei bad ym shim la lah ban pyntreikam ia ka.. kane kadei ka ophis kaban iakren ia ki ishu ban iada iaka jaidbynriew” ong u Bah Wellbirth.
Katba u President ka FKJGP u Bah Dundee Khongsit ula ong, “Ha u snem 2017, ka Executive Committee jong ka FKJGP kala rai ban tei iaka ophis ban long kum ka stieh ban iada iaka ri bad jaidbynriew bad ban saindur iaka lawei jong ki khun samla bad kumta la ai kyrteng ka shlem ban saindur iaki samla.
Ula ong ka FKJGP kan shimkhia bha ia ki mat jong ka jingbym iohkam iohjam ki samla bad ka seng kala thaw ruh iaka Youth Employment and Grievances Committee kaban khlieh da u Bah Kitboklang Nonglang bad u Khrawkupar Nongsiej kum u Secretary.
