Shillong, Naiwieng 04 : Ka Seng Kur Warjri ka la sdang ban rakhe ia ka Lyngkhuh Snem Rupa naduh ka 1tarik Naiwieng, 2022 da ka Pyninam Syntiew bad kiwei kiwei ki marrep ka ba la pynlong ha Forever Rosely Nursery, Pomlum ka ban kut ha ka sngi Saitjaiñ 5 tarik Naiwieng, 2022.
ka jingrakhe ka ba bud kan long da ka Dorbar Bah jong ka Kur Warjri ha Sohryngkham ha ka 11 tarik, Naiwieng, 2022 naduh 10 baje mynstep. Ia kane la pyntip da u Bah Sunshine Warjri, Saiñpyniar ka Seng Kur Warjri ha ka lympung pathai ha ka ba u la kyrpad ia baroh ki parakur na kylleng ka Bri Hynñiewtrep ba kin ia poi ryntih ha katei ka sngi.
La iathuh lyngkot ruh ia ka jingthmu jong ka seng Kur Warjri bad ki kam ba la leh ha kine ki arphewsan snem ba la leit kata naduh ba la seng ha u snem 1998. La pyntip ba naduh ba la seng ki don tang kumba lai tylli ki shnat bad mynta pat ki la roi haduh kumba laiphew tylli ki shnat jong ka Seng JKur Warjri. Ka jingrakhe ia ka lyngkhuh arphewsan snem kan kut ha u snem 2023 da ka Dorbar Bah ka ban long ha Mawphlang.
Ha ka ba iadei bad ki rong ki taw ban rakhe ia ka Lyngkhuh Snem Rupa, u Bah Kester Warjri, Shongknor ka Lympung Rakhe u la iathuh ba kin don ki lat ki ba khia thew kum ka thoh ka tar ha ki ba bun ki rukom naduh ka thoh khana, thoh phawar, nangta ka thohdur bad kiwei kiwei ki kam pynproh jabieng bad pynphuh pynphieng artat ia ka jingrakhe.
Nalor kata kin don ruh ki tamasa shad, rwai bad tem sur bad kiwei kiwei ki kam byrngia ki ba kynthup ruh kum ka jingthmu ban kyntiew ia ki sap jong ki samla ha ka Kur Warjri.
Ka Seng Kur Warjri ka la pyrto ruh ia u synñiang jong u Khliehduh ba mynshwa u Bah D L Warjri, u ba la khlad noh na ka pyrthei mynshym snem bad mynta la shimti ia ka kam khliehduh da u Bah George Warjri ha ryngkat bad la ka kynhun treikam.
