Shillong, Nailur 29 : Uwei u nong Assam ula iap hashen na ka jingbat ka bording elektrik jong u sainar 11 KV uba dkut bad leit hap ha kawei ka kali ba dang iaid ha surok National Highway-06 ha shnong Pyrtakuna, kaba don marjan ka Umkiang, East Jaintia Hills District.
Kane ka jingjia kala jia ha ka janmiet sngi Nyngkong ha ka por 6:30 baje eiei. Kane ka kali ba hap u sainar ka dei ka Maruti Eeco ba don u nombor AS01-TC-6015 kaba thmu ban leit sha Badarpur ha Assam.
Kat kum ka khubor Pulit, une u sainar bording ula dkut kynsan bad leit hap beit beit ha kane ka kali kaba dang iaid. Ka kali kala kem ding mar syn tyngkhuh bad une u sainar haduh ba kan da ingkhong khait.
Uwei u briew ba kyrteng u Riyaj Uddin ba na Karimganj, Assam, ula iap ha kane ka jingjia. Une u briew ula sahkut hapoh ka kali bad iap hashen.
U nongniah, ula ioh ban mih na ka kali mar syn hap une u sainar bad mynta ym pat lapdien satia shano une u nongniah u don.
Ki Pulit kila register case ia kane ka jingjia bad ka jingtohkit mynta kala iaid shakhmat.
