Shillong, Nailur 29 : Uwei u Rangbah ba 59 snem, Bah Sylvester Shadap ula pynkhreh mynta ban iakhun ia ka eksam Secondary School Leaving Certificate (SSLC)-kaba la wan long hadien 37 snem ba ula iehnoh ia ka jingleit skul.
U Bah Sylvester uba dei na ka shnong Thadrang Umngem ha Ri-Bhoi District, un dei uba heh rta duh napdeng ki 9,767 ngut kiba la pep skul shiteng por, kiba la register ban iakhun ia ka eksam SSLC kum ki kyrtong shimet (private candidate) hapoh ka Meghalaya Second Chance Learning Programme.
Ula pep noh ia ka jingleit skul ha u snem 1989 bad u don ka jingngeit ba ka jingwan phai biang sha ka pule dangle kam dei satia kaba dang don jingeh.
“Nga la pep ban leit skul ha u snem 1989, kumta kala long kumba 37 snem naduh katei ka por. Haba kren hok, Nga tip halade ba ka jingleit pule biang kala kut” ong u Bah Sylvester.
Mynta u Bah Sylvester ula rai ban iakhun ia ka eksam SSLC 2026 ban long ha u bnai Nohprah bad ong ba u kwah ban pyni ia ka nuksa na ka bynta ki Khun ki Kti ha ka longiing jong u bad kiwei pat ki samla kiba la iehnoh shiteng por ia ka jingleit skul.
“Ka jingmih ban iakhun ia ka eksam SSLC ka long ban pyni ia ka nuksa sha baroh ki khun samla, kaban sdang shuwa nala ka jong ka Iing” ula ong.
Ban pynkhreh ia ka eksamin hadien sawphew snem duna kam dei kaba suk. U Bah Sylvester ula ong b aula shem jingeh ban pynkhreh ialade bad ki jingkylla ha ki curriculum lem bad ka jingpep leit skul la bun bun snem.
“Wat hapdeng kane, ka thong ka long ba ngan trei shitom na ka bynta kane ka eksam” ula ong.
Ki 9,767 ngut ki kyrtong kiba la register ha kane ka prokram ki kynthup ia ki samla ba dang khie dang san, ki samla bala kham iaw ka rta bad ki briew kiba la heh ka rta na baroh ki 12 tylli ki District ka Jylla. Kam don satia ka jingbuh pud ia ka rta ban iakhun ia ka eksam SSLC kum ki kyrtong shimet.
Ka Second Chance Learning Programme ka dei ka prokram ba iatreilang hapdeng ka Sorkar Jylla, ka Meghalaya Board of School Education (MBoSE) bad ka Meghalaya Programme for Adolescent Wellbeing, Empowerment and Resilience (MPOWER). Ka shah ia ki briew kiba pep skul shiteng por ba kin pynkhreh bad iakhun ia ka eksam SSLC khlem da donkam ban hap leit skul.
Ka prokram kala buh ia 171 tylli ki jaka ai jinghikai ha kylleng ka Jylla. Ka Ri-Bhoi ka don haduh 690 ngut ki kyrtong kiba la register ban iakhun ia ka eksam bad haduh 185 ngut kila register ha Mawlasnai Centre.
Ka eksam ha u bnai Nohprah kan ailad ia u Bah Sylvester bad ki hajar ngut kiwei pat kiba pep skul shiteng por ba kin ioh ia ka lad ba kin pyndep ia ka kyrdan pule klas X bad nang bteng ia ka jingpule, ki lad ban leit sha ki vocation training bad kiwei kiwei.
