Shillong, Naiwieng 04: Ka United Democratic Party (UDP) kala poi mynta sha ka jingkyrduh kyrtong ban pynmih na ka Mawphlang Constituency ha ka elekshon MLA-2023 tang namar ka jingbym shaniah ki Nongialam ia u President barim ka FKJGP Bah Wellbirth Rani, ba sheptieng ioh ka kyrtoh kylla ia ka kam nongialam ha ka Party.
Ka UDP haduh mynta kam pat ioh satia ia u kyrtong ban pynmih na Mawphlang Constituency, da ka jingrai jong u MLA ba mynta Bah Eugeneson Lyngdoh ban nym iakhun shuh ia kane ka elekshon ban wan namar ki daw shimet.
U Presdident barim ka FKJGP Bah Wellbirth Rani uba la pyniasoh ialade sha ka UDP ha ka 16 tarik u Nailar , u dei uba la paw kyrteng bha ban mih aireng ha kane ka elekshon ban wan bad ba ap ia ka ticket jong ka UDP na Mawphlang Constiteuncy hynrei da ka jingdon u Bah Eugeneson, une u Rangbah ula rai ban nym mih aireng shuh bad ban pynkhlain ia ka UDP kum ka party.
Kat kum ka khubor ba iajan bad ki Nongialam ka UDP ka iathuh, ba u Bah Eugeneson ula pyntip la katto katne bnai sha ki Nongialam ka UDP ba um don jingthmu shuh ban iakhun ia ka elekshon bad ban wad kyrtong noh da uwei ban pynmih ha ka elekshon ban wan.
Ka khubor ka iathuh ba ki Nongialam ba hakhlieh ka UDP ha ka jaka ban phai khmat sha u Bah Wellbirth Rani, kila leit ban wad kyrtong dalade na Mawphlang da kaba buh shadien ia une u Nongialam barim ka FKJGP bad kila leit tyrwa ticket ruh wat sha u Nongialam ka PDF Bah Auspicious Lyngdoh Mawphlang bad ia u Khun jong u MLA barim Bah J.A Lyngdoh hynrei kine ki arngut kila kyntait ia kane ka jingtyrwa.
Ki Nongialam ka UDP ki iathuh ba ka jingleh kiar ia u Bah Wellbirth Rani ka dei tang namar ka jingsheptieng ioh ka kyrtoh kylla ia ki Nongialam ba hakhlieh hadien ka 2023 namar ka kam long Nongialam hapoh ka Party.
Haba pynthikna ia kane ka jingbym don kyrtong shuh ka UDP na Mawphlang, u President ka UDP East Khasi Hills Bah Titostarwell Chyne ula ong “Haduh mynta ngim pat ioh kyrtong ban mih bujli ia u bah Eugene na Mawphlang bad ngi dang iai wad”.
“Ngin sa ioh ia u kyrtong tangba mynta ngi dang iawad” ula ong.
