Shillong, Naiwieng 03: Ka seng Hynniewtrep Integrated Territorial Organization (HITO) hynne ka sngi palei kala leit pan jingshai na ka Ophis ka Deputy Commissioner ka East Khasi Hills, halor ka jingpynjari ia ka kyndon 144 CrPC hapoh ka Nongbah Shillong.
Ka HITO kala iakynduh ia u Additional Deputy Commissioner ka East Khasi Hills District bah R. Wahlang bad aiti iaka dorkhas bad pan jingshai ia kane ka kam.
Haba kren sha ki lad pathai khubor u President ka HITO bah Donbok Dkhar u la ong ba ka jingpynjari ka Deputy Commissioner ka East Khasi Hills iaka kyndon 144 CrPC ha Nongbah Shillong ka dei kaba iatyngkhuh bad ka Article 14, 19 bad 25.
U bah Donbok ula ong ba naka liang ka HITO kan ym lah ban pdiang ia kane ka jingpynjari iaka 144 CrCrP bad la kyntu iaka ophis ka DC ban weng noh ia kane ka jingpynjari bad ban ai noh da kiwei ki kyndon ym da ka 144 namar kan ym iahap.
“Ka Deputy Commissioner kadei ban buh noh da kiwei kiwei ki kyndon namar ba ym dei tang ki sengbhalang kiba iakhih hynrei naduh ki nonghikai, ki nongshet ja sngi ruh ki iakhih” ula ong.
“Katkum ka jingpynshai ba ngi ioh, la ong ba la pynjari ia kane ka kyndon hadien ba la mih ka jingiakulmar ha ka 28 tarik Risaw 2022 ha ka jingiaid paidbah da ka seng FKJGP,” ong u bah Donbok haba bynrap “Ban shu pynjari ia kane kyndon tang namar ba ka bor District kam lah ban tehlakam ka long ka bym lah ban pdiang.”
Une u Nongialam ka HITO u la ong ba lada ka sorkar kam weng ia kane ka kyndon, ka seng kan leit tied jingkhang sha ka Iingkashari ka Meghalaya High Court.
