Imphal, Naiwieng 02 : Hadien ba ki sim Amur falcon kiba dei ki jait sim kiba lah ban her jngai tam ha ka pyrthei kila sdang ban wan poi ha ki jaka khlaw bapher bapher ha Manipur, khamtam hapoh Tamenglong district, na ka liang ka sorkar kala shim ia ki sienjam kiba pyrkhing na ka bynta ban aijingiada ia kine ki jait sim.
Da kaba pynjari ia ki kyndon ain jong ka tnat Wildlife Protection Act, 1972, na ka liang ki bor pyniaid district jong ka Tamenglong , Senapati bad Ukhrul kila khang pyrshah ban siat, ban kem, ban die ne pyniap ia kine ki sim kiba wan buhai shnong ha kane ka jylla.
Na ka liang ki bor pyniaid district ha ryngkat ki bor pulit bad ki heh ka tnat forest kila kem noh ia sawngut ki briew halor ka jingdonkti ha kaba leit riam ia kitei ki sim ha Tamenglong ha kane ka sngi U Blei ba la lah ha kaba kila ioh ruh ban kurup na ki ia laitylli ki suloi airgun bad 27 tylli ki sim Amur falcon kiba la iap.
Ia kine ki briew la dain kuna bad pynngat ha ki kyndon ain, katba ia kine ki sim kiba la iap la tep noh, ong ka tyllong khubor heh sorkar kiba la ong ruh ba ia kine ki suloi da kurup noh da ki pulit.
Na ka liang u heh ka tnat forest ka Manipur u Longjam Joykumar Singh ula iathuh lyngba ki lad pathai khubor hynnin ka sngi ba Ar ba ki nongtrei jong ka tnat forest ha ryngkat ka jingkyrshan lang da ki club hapoh ka thain, ki seng bhalang bad ki nongshong shnong kila pynlong ka jingpeitngor ha kito ki jaka khlaw kiba i suba na ka bynta ban aijingiada ia kine ki sim Amur falcon.
“Ka jingioh jingkyrshan ba pura na ki nongshong shnong, ki sengbhalang bad kiba ieit mrad kala iarap shibun ban tehlakam ia kane ka jingleit siat ne riam ia kine ki sim Amur falcon na ka bynta ban bam doh.Hynrei, kila don pat katto katne ki khep ba ki dang don ki briew kiba leit riam ne siat ia kine ki sim,” ong u Joykumar.
Na ka liang u riew shemphang ha kaba iadei bad ki mrad khlaw bad ki sim ki doh u L Biswajeet Meitei ula ong ba kine ki sim Amur falcon barabor ki ju wan poi hapdeng jong u bnai Risaw hapoh Manipur, kata hadien ba kila phet shnong na ki jaka shong jong ki ha ka thain shathie mihngi ka Siberia bad ka thain shatei ka China.
Hadien ba kila shong la sah ha Manipur kumba shi bnai, kine ki sim ki mih noh ban leit sha ka thain shathie bad ka thain mihngi ka Africa, ha kaba ki ju shong tang shipor hashwa ba kin leitphai biang sha kajuh ka jaka kaba ki wan nyngkong, ula ong shuh shuh.
Ha ka 4 tarik u Naiwieng 2018, artylli ki sim Amur falcon kiba shait ba khlain, kata uwei u shynrang bad ka kynthei la pyndait da u satellite transmitter hapoh Tamenglong district da ki heh ka tnat forest bad ki riew shemphang ka tnat wildlife.La pyllait ia kine ki sim ha ka sngi kaba bud na ka bynta ban lapdien ia ki lynti iaid jong kine ki sim.Hynrei tang hadien khyndiat sngi, une u falcon ula shah siat iap noh ha ki briew ha kajuh ka district.
Ha ka 21 tarik u Naiieng, kawei ka sim falcon ha ryngkat bad kawei pat ka sim bala pyndait tiar na Nagaland ha u bnai Risaw 2016, la shem kila ia her lang lyngba ka Somalia bad ka thain mihngi jong ki ri ba kyndong ka Africa.Katba katei ka sim ba la pyllait na Manipur kala her haduh 5,700 kilomitar khlem sangeh tad haduh katei ka sngi.
“Ha ka por bala pynlong ia ka Amur Falcon festival ha Tamenglong district hapoh ka shnong Phalong ka jaka ha kaba da ki hajar tylli kine ki jait sim falcon ki ju wan poi, ngi la pyniasoh lang bad ki heh ka tnat forest kumjuh ki kynhun seng na ka thain ban pynshai paidbah halor ka jngdonkam ban iada ia kine ki jait sim,” ong shuh shuh u Meitei.
