Guwahati, Naiwieng 02 : Da kaba ioh mynsiem lyngba ka ‘Bharat Jodo Yatra’ jong u Rahul Gandhi na Kanyakumari sha Kashmir, ka seng Congress ha Assam hynnin ka sngi ba Ar kala pynlong da ka jingiaid kjat hapoh Assam na ka sor rit ha ka thain khappud jong ka Golakganj hapoh Dhubri district hajan khappud ka Bangladesh sha ka thain mihngi ba pajih tam ha Sadiya kaba khappud bad ka Arunachal Pradesh.
Kane ka jingiaid kjat kan kdup ia ka jingjngai kaba haduh 834 kilomitar ha ki 13 tylli ki district jong ki jaka them ka Brahmaputra ha ki 70 sngi.U general secretary ka AICC uba dei ruh u heh ba dei khmih ia ka party hapoh Assam, u Jitendra Singh ha ryngkat u heh ka PCC u Bhupen Borah kila plie ia kane ka jingiaid paidbah ha ryngkat ka jingiadon lang jong bun ngut ki heh nongialam jong ka party.Da ki spah ngut ki nongtrei ka party congress ryngkat ki nongialam kila pyniasoh ha kane ka prokram na ka ktem ba khlain jong ka party ha Dhubri.
Na ka liang ka Congress kala phaikhmat halor ka jingthmu ban pynioh biang ia ka jingkyrshan lyngba kane ka ktem jong ka ha kane ka ilekshon Lok Sabha 2024 bad halor ki ilekshon hapoh ka jylla kaba kala synshar haduh lai samoi kynthih, kata naduh u snem 2001 haduh u 2016.
Ki nongialam ka Congress kila ther tyngeh ia ka seng BJP kumjuh ia ka seng AIUDF jong u Badruddin Ajmal da kaba kynnoh ia ki halor ka jingpyntreikam ia ki polisi kiba pyniapait iapra. “Ka la don ka jingthrang hapdeng kiba bun ki paidbah.Ka dei ka jingialap da ki nongshong shnong jong ka Assam kiba la mad ia ka jingshah banbein ha ka jingsynshar jong ka BJP,” ong u Singh.
Kane ka jingkynthoh ka long ruh pyrshah ia u Ajmal uba la mihkhmat ia ka Dhubri ha ka Lok Sabha ilekshon bad uba long ka dawbah halor ka jingtroin ka seng Congress hapoh ki district ba shong shnong da ki rit paidbah kum hapoh Dhubri ha kine ki shiphew snem.
U Singh ula ong ba u Ajmal ula ialam bakla ia ki paidbah nongshong shnong ka Dhubri bad kynnoh ruh ba u dei u agent jong ka seng BJP.
