Shillong, Naiwieng 02: Ka National President ka BJP Mahila Morcha ka Vaneathi Srinivasan, ka la ong ba ka long kaba donkam ban pynmih ia shibun ki kyrtong longkmie ban iakhun haka ilekshon 2023.
Haba kren sha ki lad pathai khubor ka Vaneathi Srinivasan ka la ong ba ka jingwan jong ka sha nongbah Shillong kadei naka bynta ban iathir bad ki nongkitkam ka Mahila Morcha ban khring iaki kynthei bad iaki longkmie sha ka BJP khnang ba kin lah ban trei naka bynta ka jingmyntoi ki longing hapoh ka jylla Meghalaya.
Ka Vaneathi kala ong ba ka jingrung ki kynthei bad ki longkmie shaka BJP kan wanrah ia shi bun ki jingmyntoi namar ki longkmie ki don ka bor ban wanrah jingkylla haka imlang sahlang.
“Naka liang ka BJP ka kwah ban khring ia shi bun ki kynthei bad ki longkmie ka Meghalaya sha ka party bad ka kwah ban iohi shi bun ki longkmie ki ban iakhun ha ka ilekshon 2023 ban wan khnang ba ki longkmie kin don bynta ban kyntiew iaka roi ka par hapoh ka jylla” la ong ka Veneathi.
Ka Vaneathi ka kyntu iaki nongkitkam jong ka Mahila Morcha ka jylla Meghalaya ban iawer lem iaki kynthei bad longkmie shaka BJP bad ban pynsngewthuh iaki halor ki skhim ka sorkar pdeng khamtam kito bala mang kyrpang naka bynta jong ki.
Haba kylli haduh katno ngut ki kyrtong longkmie ka BJP Meghalaya kan pynieng haka ilekshon 2023, naka liang ka Vaneathi Srinivasan kala ong ba naka Mahila Morcha ka dang bishar bad wad briew bad ia kane ka rai yn sa shim hi da ka Mahila Morcha Meghalaya.
