Aizawl, Naiwieng 01: Ka seng Young Mizo Association (YMA), kaba dei ka kynhun seng ba donbor ha Mizoram, ka la kyntu ia ka sorkar jylla ba kan shna da ki jaka shong shipor ha kajuh ka jaka kaba biang na ka bynta ki 30,500 ngut ki nong Myanmar kiba la wan shong riehtngen ha kane ka jylla hadien ba ki shipai kila kurup jubor ia ka bor synshar hapoh kane ka ri ba marjan naduh u bnai Rymphang jong ka snem ba la dep.
Kane ka jingdawa jong ka YMA ban shna ia kine ki jaka shong shipor ha ka jaka kaba biang kaban khanglad ia ka rung ka mih laitluid namar ka jingjur jong ki kam pyntriem ba la leh da ki nong Myanmar ha kane ka jylla kaba iasam ia ka jaka khappud ba khlem ker kaba ha ka jingjngai kaba 510 kilomitar bad ka Myanmar.
Katkum ka jingioh jingkhein kiba bun na kine ki 30,500 ngut ki phetwir nong Myanmar, kaba kynthup ia 11,798 ngut ki khynnah bad 10,047 ki kynthei ki shong ki sah ha palat 156 tylli ki ktem sah shipor ha baroh ki 11 tylli ki district ha Mizoram, katba kham bun na kine ki shong ki sah bad la ki jong kiba haiing hasem, ki ieng shnong, ki iingwai, iing sorkar, ki iing ba la pynkhreh da ki NGO kynthup ia ka YMA bad kiwei pat.
Na ka liang ki heh sorkar ka Mizoram kila ong da kaba pynshong nongrim halor ka jingrit jong ka jylla, kumta ruh ka jingshna ia ki jaka shong shipor tang ha kawei ka jaka ka long kaba shem shitom bad ka ban wanrah ruh ia shibun ki jingeh nalor ka jingmih jong ka jingiakynad.
U general secretary ka YMA, u Lalnuntluanga ula ong ba ka seng ha ka general conference kaba la long ha ka sngi Palei ba la dep kala shim ia ka rai ban leit sha ka sorkar jylla na ka bynta ban kyntu ban thaw ia ka jaka shong kaba ha kajuh ka jaka na ka bynta kine ki phetwir nong Myanmar khnang ban khanglad ba kin sakma ha ki bynta bapher bapher ka jylla.
Nalor kata ula ong ruh ba na ka liang ki nongmihkhmat ha kane ka jingialang kila pynpaw ba kumba kalong mynta kine ki phetwir nong Myanmar kila saphriang ha ki jaka shong shipor bapher bapher, ha ki shnong ki thaw, abd ha ki iing ki sem bapher bapher ha baroh ki bynta jong ka jylla, bad kine ki lah ban wanrah jingeh hadien habud.
Ha kawei pat ka bynta na ka liang ka tnat shipai Assam Rifles kaba iada ia ki jaka khappud hapdeng ka India bad Myanmar ruh kala pynpaw ka jingsngewkhia kaba jur halor ka jingjur jong ki kam pyntriem kaba kynthup ia ki kam khaii beain da ki nong Myanmar.’
Ki heh ka Assam Rifles kila ong ba kila ioh ban kem ahduh 35 ngut ki nong Myanamr tang mynta u snem halor ka jingdonkti ha ki kam khaii beain.Kumjuh na ka liang ki bor pulit ka Mizoram ruh kila ioh ban kem ia bun ngut ki nong Myanamr namar ka jingdonkti ha ki kam khaii beain.
