Agartala, Risaw 29 : Da kaba pynrem jur halor ki laitylli ki jingjia shah leh beijot kiba la jia tang hapoh ka shitaiew ha Tripura, na ka liang u Myntri Rangbah (CM) barim u ba dei ruh u nongialam liang pyrshah u Manik Sarkar ula kynnoh ia ka sorkar ba la ialam da ka BJP halor ka jinghiar arsut ka jinglong jingman bad ruh ka jingpulom ha ka liang ka tnat pulit ban shim ia ki sienjam na ka bynta ban pynioh ia ka jingbishar hok na ka bynta kine ki lanot.
U Sarkar ha ka jingai jingkren lyngba ka social media ha ka jan miet sngi Palei ba la lah ula ong ba ka jingpulom jong ka sorkar synrop BJP-IPFT ha Tripura ka la ialam ia ki samla ka jylla sha ki jingkyrni dih drok bad kiwei pat ki jingdih pynbuaid ha kine ki saw snem shiteng ba la dep khnang ba ka party synshar kan lah ban weng ia ki jingkylli kiba rah da ki samla halor ki jingkut jingmut jong kane ka party sain hima hashwa ba kan wan ha ka bor synshar.
Nalor kata ula ong ruh ba kum ki nongshong shnong jong ka imlang ka sahlang kaba koit ba khiah ka ban jur ia ka tnat pulit ba ka dei ban shim ka jingpynshitom pyrshah ia kito ki runar kiba donkti ha kitei ki kam leh beijot. “Ngam lah ban tei pop ia baroh ki police station ne ki bor pulit.Haba kiba haiing hasem jong ki lanot ki leit ban ujor sha ki police station pyrshah ia ki briew kiba shah kynnoh donkti, na ka liang ki bor pulit ki kyntu ia ki ba kin ia pynbeit hi hapdeng jong ki.Kito ki lanot jong ka jingshah thombor kila kam ba na ka liang ki pulit ki tip ruh mano ba thombor ia ki.Kata kaba mut ba ki pulit ki ieng ha ka nongrim ban ai jingiada ia ki nongthombor,” ong shuh shuh utei u CM barim.
“Da kaba pynpaw ia ka jingsngew bitar, ki lanot lem bad kiba haiing hasem nalor ki nongshong shnong kiba don ia ka jingkitkhlieh na ka bynta ka imlang ka sahlang kila ong ba shano ngin leit? Mano ban shim ia ka jingkitkhlieh ban iada ia ngi lada ki pulit ki aijingkyrshan ia ki briew kiba shah kynnoh donkti? Ha ki khep, ki don ruh ki briew kiba shong hapoh ki police station na ka bynta ban iarap ia kito ki briew kiba shah kynnoh donkti.Ha kaba kum kane ka jinglong jingman, kumno kin don kiba nud ban leit ujor FIR? Ha kum kane ka jinglong jingman ki pulit ki dei ban ioh ia ka jingpynrem jur, bad baroh ka tnat pulit kala ngat lang ha ka jingshah kynnoh,” ong u Sarkar.
Haba phai halor ka bynta jong ka Tripura Commission for Women une u nongialam liang pyrshah ula ong; “Hadien ba la thaw ia ka kynhun kaba thymmai jong ka Women’s Commission, ki dkhot kila pyrshang ban leit jurip sha kito ki jaka kiba jia ki kam thombor pyrshah ia ki kynthei.Na ka liang ki paidbah kim lah ban tip kiei ki sienjam kiba kila shim ?Mynta ngi iohi ba ka TCW kala nangtlot, bad kam lah bha shuh ban treikam bad ruh ban lap ia ki jingshisha baroh.
