Shillong, Risaw 28: U Symbud Myntri Rangbah ka jylla bah Prestone Tynsong hynne ka sngi thohdieng, ula bthah iaki Pulit ba kin wad bad ban leh eiei pyrshah ia ki briew kiba donkti ban shoh ia ki nongiaid nongieng ha ka jingiaid rally jong ka Federation of Khasi Jaintia and Garo People (FKJGP).
Bun ngut ki briew kynthup ki Nongthoh Khubor kila shah shoh bad don ruh ki kali kiba la shah pynjulor ha ki nongiashim bynta ha kane ka rally kaba la pynlong halor ka jingkyrduh kam kyrduh jam jong ki samla.
“Ngi la bthah ia ki Pulit ba kin leh eiei bad nga la kren ruh ia u SP (City). Mynta ki Pulit ki dang wad ia kiba donkti bad ka Ain kan iaid hala ka jong ka lynti” ula ong haba iakren bad ki nongthoh khubor.
Haba kylli, u Bah Prestone ula iathuh ba ula bthah ia ki Nongialam ka FKJGP bad kiwei kiwei ki Seng ba ki dei ban tehlakam iala ki jong ki briew khnang ba kan nym mih kano kano ka huri hura haba don kum kine ki jingiaid rally.
“Ki pulit kila sdang iala ka kamram ban ithuh iaki briew ba shoh briew ha Khyndai Lad bad Dhanketi bad naka liang ki bor district ruh ki dang leh iaka kamram ban pynthikna ba kum kine ki jingjia kim jia shuh ha ki sngi ban wan” ong u bah Prestone.
U bah Prestone ula ong ba kino kino ki seng ne ki paidbah ki don ka hok ban pynlong ki jingialang ne jingiaid paidbah hynrei ki nongialam jong ki seng kidei ban tem iala ki dkhot ba kan nym mih ka jinghuri hura.
Ula ong ba mano mano ruh kim don hok ban shim iaka ain ha kti namar ka ain ka don bad kan leh iaka kamram lada mih kum kine ki jingjia shah thombor ki briew haka por pynlong jingialang ne jingiaid paidbah.
