Shillong, Risaw 28 : U Symbud Myntri Rangbah ka Jylla Bah Prestone Tynsong hynne ka sngi thohdieng, ula iathuh ba u dang ap ban ioh ia ka kaiphod na ki bor pyniaid District halor ka jingujor pyrshah ia u Myntri Bah Dasakhiat Lamare halor ka jingkynnoh ba u sam pisa sha ki paidbah ka Nongkrem Constituency.
“Nga dang ban ioh ia ka kaiphod na ki bor District. Kum kine ki kam hi ngam lah ban tip la ki dei kiba shisha ne em, hynrei ngin ap haduh da ioh ia ka kaiphod na ki bor District…lehse ngan sa lah ban ong eiei halor kata” ong u Bah Prestone haba iakren bad ki nongthoh khubor.
Haba kyntait ban nang kynthoh, u DyCM ula ong “Tad haduh ba treikam ka Model Code of Conduct, ka kyndon ain elekshon kan sa treikam pura bad ngi hap ban bud ia ka”.
Haba pynpaw u Chief Electoral Officer (CEO) ula phah ia kane ka kam sha ka Deputy Commissioner, u Bah Prestone ula ong “…Ai ba ki bor District kin shim ia baroh ki sienjam ha kaban pynshisha bad lehse kin sa phah ia ka kaiphod sha ka Sorkar Jylla.
Ha ka 24 tarik Risaw, u Myntri ka Tnad PWD (Building) bad MLA ka Mawhati Bah Dasakhiat Lamare ula ong ba um sngew eiei ban leit shong sha phatok namar ka jingiarap ia ki briew ka Nongkrem Constituency, kaba u mut ban mih iakhun ia ka elekshon MLA 2023.
