Nongpoh, Risaw 28: Ka Patharkhmah Civil Sub Division Demanding Committee lem bad u MLA ka Jirang Konstituensi, Bah Sosthenes Sohtun ki la pynpaw ia ka jingkmen bad jingsngewnguh halor ka rai jong ka sorkar jylla ban kyntiew kyrdan noh ia ka Patharkhmah Administrative Unit sha ka Civil Sub Division.
Ia kane ka rai jong ka Sorkar la pynbna da u Myntri Rangbah ka Jylla Conrad K Sangma ha ka jingialang kaba la long ha madan Byrnihat.
Haba kren bad ki Nongthoh Khubor, u Bah Sosthenes Sohtun kum u MLA ka Jirang Konstituensi bad u Bah Isman Lyngdoh, Chairman ka Patharkhmah Civil Sub Division Demanding Committee, ki la pynpaw ia ka jingkmen bad jingsngewnguh ia ka sorkar jylla MDA kaba la lamkhmat da ka NPP kaba la lah ban pynurlong ia ka jingangnud jong baroh ki paidbah nongshong shnong ka Jirang Konstituensi ha kaba ia dei bad ka jingdonkam kyrkieh ban kyntiew kyrdan noh ia ka Patharkhmah Administrative Unit sha ka Civil Sub Division.
“Kane ka jingdawa ka la iaid mynta la bun phew snem kaba la dawa naduh ba dang bat Myntri Rangbah u Ma JD Rymbai (Bam Kwai ha Dwar u Blei) bad na kawei ka sorkar sha kawei pat bad na u wei u Myntri Rangbah sha u wei pat, hynrei kane ka jingangnud kam shem la urlong hynrei dei tad haduh kane ka khyllipmat ba kane ka jingdawa ka la urlong noh da ka jingshimkhia jong ka sorkar jylla lyngba u Myntri Rangbah ka Jylla u Conrad K Sangma”, ong u Bah Sohtun bad Bah Lyngdoh.
