Pynshai paitbah ka DSBMU ban ym pyndonkam shuh їa ki plastik
Nongstoiñ, Nailur 20: Ka jingpyrta slogan “Ha Ri lajong katba mon” jong ki kynhun Sengbhalang ban pyni ia ka hok longtrai halor ka khyndew ka shyiap, kala rung ha manla ki thliew Iing ka Ri-lum Khasi bad Jaintia hynrei uwei u Ophisar ka Jylla u la kynthoh ba kane ka slogan kan ym don jingmut satia lada ki Nongshongshnong kim nang ban burom bad sumar ruh ia ka mei mariang.
Une u Ophisar u dei u Senior Environmental Engineer ka State Polution Control Board Shillong Bah W.R Kharkrang, uba la kren ia kane ka kyntien ha ka jingialang ialap paidbah ia ka khuid ka suba ha sor Nongstoin kaba la pylong da ka District Swaach Bharat Mission West Khasi Hills, ha ryngkat ka jingїatreilang bad ka ophis u Deputy Commissioner bad ka Seng Samla New Nongstoiñ hynne ka sngi ba-ar.
Kane ka jingialap paidbah ka long ruh kaba la pynlong ban pynsngewthuh ia ki paidbah ba kin kiar noh na ka jingbret pathar ia ki mar ki bym pyut kum ki bilor, ki plastic bad ki jaboh jabain kiba pynjaboh ia ka sawdong sawkun bad kiba lah ruh ban buh jingma ia ka koit ka khiah jong ki nongshongshnong.
U Bah Kharkrang ula pynshai ba ki nongshongshnong ka Jylla ki dei ban shemphang noh mynta bad ka por kala dawa ruh ba kin sngewthuh ba ka jingkhuid jingsuba ka dei ka spah bah ha ka jingim briew.
Haba kyntu ia ki paidbah ban kiar noh na ka jingbret pathar ia ki mar ki bym pyut kynthup ki plastic, une u Heh Ophisar ula ong “Ha kine ki arsnem ba wan lynshop ka khlam Covid-19, ka mariang kala sdang ban khuid bad itynnad hynrei phewse mynta ka mariang bad ki sawdong sawkun kila sdang ban jaboh biang”.
Une u Ophisar ula ong ruh ba ha kine ki sngi ba mynta la iohi ha kylleng ki Shnong bad ki jaka ba ki briew ki burom bad lehkhuid haduh katta katta ia ki jaka mane Blei, ki jaka Knia, kiba la thaw hi da u briew hynrei lyngngoh pat ba kim nang ban lehkhuid ia ki sawdong sawkun bad ka mei mariang kaba la thaw da u Blei.
“Ka jingpynjaboh їa ka mariang ka dei ka lynti sha ka jingjah rngai jong ka jaitbynriew” ula ong haba kynthoh “Kam don jingmut ban pyrta ‘ha ri la jong katba mon’ lane ka ri Khasi ka dei ka ri kaba kyrpang lada ngim ñiew kor їa ka mariang bad ngim sngewsarong їa la ka jong”.
U Bah Kharkrang ula ai jingmut ia ki paidbah da kaba ong “Lada phi ieid bad burom ia ka mariang, sdang pyndonkam noh da ki sla met bad ki pla jain ha ki jaka jong ki plastic” haba pyntip ruh ba naduh mynta ka sngi, ka Sorkar kam shah shuh ban pyndonkam plastic nangne shakhmat bad ki bor District kin sa pynlong ia ka jingkhynra iaki dukan bad kan pynshitom ia kiba pynkhein ain.
Ia kane ka jingialang ialap paidbah ia ka jingkhuid la pynlong ha Market Complex ha khmat їew Nongstoiñ, ha kaba la pynїaid da u bah G.T Marbañiang Secretary ka shnong New Nongstoiñ ha ryngkat ka jingїadon lang u bah M.Diengdoh MCS Additional Deputy Commissioner, bah B.Toi Executive Engineer PHE West Khasi Hills, u bah J.R Nongsiej District Coordinator DSBMG West Khasi Hills bad kiwei kiwei ki nongtrei sorkar bad ki riew rangbah ka thaiñ.
Haba ai jingkren ha katei ka sngi u bah M.Diengdoh u la ong ba man la ka por, ki bor pynїaid district ki la ju pynlong їa ki prokram ha ki skul bad ki shnong bapher bapher, ban pynsngewthuh їa ki paidbah halor ka jingkordor jong ka jingleh khuid bad kumno ban lum ban lang їa ki jaboh jabaiñ ha ki jaka ba la pynkhreh bad ban pynїakhlad ruh їa ki ba pyut la ka jong bad ki bym pyut kum ki plastic, ki bilor bad ki tin bad ki kynja alluminium la ka jong ka jong.
U la ong ruh ba ka sor Nongstoiñ ka don ar tylli ki wah kiba tuid napdeng ka sor kata ka wah Nonbah bad Nondeiñ bad la kumba katto katne snem ka Town Committee, ryngkat ka Dorbar shnong New Nongstoiñ ki la pyrshang katba lah ban ym shah ba ki paitbah kin bret їa ki jaboh jabaiñ ha kitei ki wah bad ha kine ki sngi ki paidbah ki la sdang ban sngewthuh, hynrei katei ka um kam pat long kaba khuid bad kaba bit ban dih.
