Shillong Nailar 10: U Maharaj ne u Syiem ka Tripura u Pradyot Deb Barman ula ai jaka na ka bynta ban tei ia u Mot Sahnam jong u Rev JJM Nichols Roy u Kpa jong ka Sixth Schedule bad ban seng ia ka Tirot Sing Syiem Memorial School ha Tripura.
U Pradyot Deb Barman ula pynbna ia kane hynne ka sngi saitjaiñ, haba iakren bad ki nongthoh khubor hadien ba la wai ka jingialang jong ki 10 tylli ki Autonomous District Council kaba la long ha Nongbah Shillong.
“Ngi lah rai ba ngin tei ia u moh ban pynshanam ia u JJM Nichols Roy uba long u Kpa jongka Sixth Schedule ka riti synshar ka ri bad ngi dei ruh ban tei ia u mot sahnam jongu Pa Togan Sangma, Tirot Sing Syiem, Kiang Nangbah bad Upendra Brahma namar kim dei satia tang ki khlawait jong ki Khasi, Garo ne Bodo hynrei kidei ki briew kiba la iakhun na ka bynta ka ri bad ka kolshor ka jong ngi. Kumta lada ngi lah ban leh ia kane mynta kumta ha kiwei pat ki sngi kin sa leh lang kumjuh ia ngi ruh” ong u Pradyot.
Nalor kane ula ong, ba District Council ha Tripura kan plie ruh ia ka skul ha North Tripura bad yn ai kyrteng da ka Tirot Sing Memorial School kaba dei ka jaka kaba sah da ki jaidbynriew Khasi.
U CEM ka KHADC u Bah Pyniaid Sing Syiem, ula iathuh ba na ka liang u CEM ka Bodoland ula ai jaka sngewbha ia baroh ki District Council na ka bynta ban buh ia kino kino ki jingtei la kadei ka Guest House ne ophis treikam.
Ula ong ruh, ba ka jingialang kila iakren ruh ban don ia ki Cultural Exchange Programme hapdeng ki ADC baroh, ia kaba yn pynlong ha kylleng ki bynta jong ki District Council kiba don ha kathain shatei lam mihngi khnang ba kan don ka jingiadei kaba iajan hapdeng ka jong ki.
