Shillong, Nailar 17: Ka Dorbar Synrai jong ka Iingdorbar Thaw Ain ka Jylla kan sa long naduh ka 9 tarik Nailur haduh ka 16 tarik Nailur.
Ia kane ka calendar jong ka Dorbar Synrai la mynjur ha ka jingialang jong ka Business Advisory Committee (BAC) bala pyniaid da u Lamphang ka Iingdorbar Bah Metbah Lyngdoh hynne ka sngi Balang.
Kiba la iashimbynta ha kane ka jingialang ki kynthup ia u Symbud Myntri Rangbah ka Jylla Bah Prestone Tynsong bad u Nongialam ka Liang Pyrshah Dr Mukul Sangma.
Kane ka Dorbar kan neh hynriew sngi ha kaba lai sngi la buh ban iakren ia ki kam jong ka Sorkar Jylla kata ha ka 9 tarik, 13 bad 16 tarik Nailur katba ia ki kam jong ki MLA shimet la buh ha ka 12, 14 bad 15 tarik.
Haba iakren bad ki nongthoh khubor, u Dr Mukul Sangma ula ong ba ka Liang Pyrshah kan khmih ba kumno kan lah ban pyndonkam bha ia ka por bala ai sha ki Dkhot ha kane ka Dorbar Synrai.
“Ngi kyrmen ba kane ka Sorkar kan long kaba seisoh” ula ong.
Haba kylli ia ki ishu ba thmu ban rah da ka Liang Pyrshah, u Dr Mukul ula pynpaw ba ki don bun tylli ki ishu bad ka Liang Pyrshah kan sa shong pyrkhat lang ba kumno kan jied ia ki ishu kiba kongsan.
