Nongpoh, Nailar 17: Ka Synjuk ki Rangbah Shnong Ri Bhoi Distirct kala rai ban pyrshah jur ia ka jingthmu jong ka Sorkar Jylla ban wanrah ia ka ktem khalai Casino ha ki shnong khappud jong ka District bad ka Assam.
“Ka Synjuk ka pyrshah jur ban wan rah ïa ka Casino ha Ri Bhoi District bad da lei lei kan nym lah ban pdiang ïa kane ka Casino kaba la tip shai ba ka dei ka kam khalai kaba ktah ïa ka imlang ka sahlang bad ki longing ki longsem” ong u Bah BB Makdoh, President ka Synjuk haba iakren bad ki lad pathai khubor.
U Bah Makdoh, u la pynpaw ba kum ka synjuk kaba trei na ka bynta ka bha ka miat bad ka roi ka par ki paidbah ha Ri Bhoi da lei lei kan nym lah ban pdiang ïa ka jingthmu ban wanrah ïa ka Casino ha Ri Bhoi bad kum ka synjuk ka sngewthuh shai ba kane ka jingthmu ban wanrah ïa ka Casino ka dei kaba ktah ym tang ïa ka jingjot jong kiba bun balang bad ka ktah ruh wat ïa ka burom bad ka nam jong ka Ri Bhoi District.
“Ka synjuk kam kwah satia ban pynlong ia ka District kum ka ktem khalai” ula ong haba ai jingmut ia ka sorkar ba ha ka jaka ba kan wan rah ïa ka Casino ka dei ban wan rah da kano kano ka skul bah kum ka Kolej Sorkar ne kiwei kiwei ki jaka pule kaba long ka jingmyntoi na ka bynta ki khun samla ka dong Ri Bhoi.
Shuh shuh, u la ong ruh ba ka synjuk ka dawa ia ka sorkar jylla ba ka dei ban sngap ïa ka sur jong ki paidbah babun balang lem kumta ka synjuk ruh kam banse ban shim da kiwei ki lad ki lynti ban ïa pyrshah ïa kane ka ktem Khalai .
