Imphal, Nailur 17 : U Myntri kam iada ri Rajnath Singh ula kular ia ka kynhun ki Nongialam ka Manipur ba ka Sorkar Pdeng kan pyndonkam da ki liengsuin iapom ka Indian Air Force ban pynjulor lut ia baroh ki jaka rep poppy ha Manipur lada ka Sorkar Jylla ka hap ban leh eiei ia kane ka kam.
Ka Coordination Committee on Manipur Integrity (COCOMI) kaba dei ka synduk ki kynhun Sengbhalang ba don ha Imphal Valley, dang shen kala iakynduh ia u Rajnath Singh ha ka Iingsah jong u ha New Delhi bad batai bniah ha u shaphang ki kam khaii droks bad kam kaikhlaw.
Ka COCOMI kala air uh ia ka thup kaba jrong bha halor ki jingma jong kane ka kam ba kynthup ia ka jingtuid ki khubor syntiat sha ki Ri nongwei, ka jingioh ia ki jingtip (data) ba kongsan jongka Sorkar India kum ka jingpynkylla ia ka jaka jong ka Imphal Airport na Lamka bad ka jingpynkylla ia ka jaka sah jong kiba bun ki Metei bad ki Kuki.
Ka COCOMI kala dawa ruh ba la donkam kyrkieh ban phaikhmat bad leh eiei noh pyrshah ia ki briew kiba rep poppy ban pynmih droks bad ba donkti ha ki kam kaikhlaw nalor ka jingwan rung beain ki nongwei namar ka jingpynkhein ia ki kyndon ka soskular Suspension of Operation. Ka ong ba baroh ki jaka rep poppy ki dei ia kaban hap pynjulor noh bad ban leh eiei pyrshah ia ki briew kiba leh ia kane ka kam bymman.
La kyntu ruh ia u Myntri iada ri ba un bthah ia ki shipai Assam Rifles bad ki shipai ba kin ym iashah liang ha kane ka jingjia ba jia mynta ha Manipur.
Ka Kynhun kala kren ruh halor ka shithi bala thoh sha ka Editors’ Guild of India da ka Army’s 3rd Corps nalor ka video kaba pyni ruh ia ki Heh Shipai kiba iakren iakhana kum shiparalok bad ki kynhun kiengatiar ki Kuki, kaba lam sha ka jingbym shaniah shuh da ki paid Meitei.
