Shillong Nailar 31: U MLA bad MDC barim ka Mawlai Constituency Bah Embhah Syiemlieh un sa pyniasoh noh ialade sha ka seng National People’s Party (NPP) ban pynkhlain ia kane ka seng sha ka elekshon MLA-2023.
Kat kum ka khubor ba iajan bad ka NPP, une u Nongmihkhmat barim ka Mawlai un sa pyniasoh noh ialade ha ka 3 tarik u Nailur ban ai jingkyrshan ia u MDC Bah Teiborlang Pathaw u ban iakhun iaka elekshon MLA 2023 na ka NPP na Mawlai Constituency.
Ia u Bah Embhah ryngkat bad ki nongialam ka seng UDP, yn sa pdiang da u National President ka NPP u Conrad K Sangma ha ka jingiadonlang u National Vice President Bah Prestone Tynsong, u President ka NPP Meghalaya Dr WR Kharlukhi ha ka jingialang kaban long ha Indoor Hall jong ka Mawlai Mawdatbaki.
U Bah Embhah u dei uba la jop mar shi samoi ia ka elekshon MLA bad MDC na Mawlai Constituency bad u dei ruh u Nongialam ka UDP.
Kane ka jingmih noh jong u Embhah na ka UDP kala wan jia ruh hadien ba ki Nongkyrshan bad ki Nongbud jong u MLA ba shah sospon ka Congress Bah PT Sawkmie , kila leit pyniasoh ialade sha kane ka seng riewlum.
Une u MLA ula pynthikna ba ha ka elekshon MLA 2023, un ym iakhun shuh ia ka elekshon naka ticket jong ka Congress bad ula pyntip ba un sa aireng noh na ka UDP.
