Shillong, Nailar 31: Ka Khasi Jaintia Church Leaders Forum (KJCLF) kala pynrem jur ia ka jingshah kyndang ka Iingmane bad shah pynjulor ki mot kyntang u Jisu Khrist, ka Mary bad Joseph ha Daram, North Garo Hills District.
“Ki Dkhot ka KJCLF ka pynpaw ia ka jingkyndit bad sngewsih halor ka jingpynjulor bad pynjot ia ka Iingmane bala rim tam ha ka shnong Daram, North Garo Hills” ong ka KJCLF ha ka kyrwoh.
Ka Forum ka pynrem jur ia kine ki kam ba leh khlem da pyrkhat bad ba ktah, kaba lah ban lam ia ka huri hura ha ka imlang sahlang.
“Ka Forum ka kyntu ia ki bor sorkar ba ki dei ban leh eiei pyrshah ia kine ki runar ba donkti” kala ong.
Ha kajuh ka por, kane ka kynhun ki Nongialam Niam ka phah ia ka khubor ai jingkyrshan bad jingialong kawei sha baroh ki riewngeit kiba shah ktah, ki Nongialam ka Parish bad ki Nongialam jong ka Balang.
