Shillong, Jylliew 10: Ka Tnad Jngohkai jong ka jylla kala pynbna ban pyni paidbah ia ka series ‘Postcards from Meghalaya’ ha ka National Geographic.
Kane ka prokram ka thmu ban ialam ia ki nongpeitkai sha ki jaka kiba itynnad bad kiba shohbiej jong ka Meghalaya, kaban pyninam ruh ia ka jingriewspah ha ka kolshor, ka jingitynnad jong ki lum ki wah bad ki jingbam kiba bang.
Ia katei ka prokram la pynmih da ka National Geographic Creative Works, ‘Postcards from Meghalaya’ ka ban pyni sha ki nongpeitkai ia kiei kiei kiba kim pat tip shaphang ka jylla bad ia ka riti ka dustur jongka. Na ka surok kaba dap da ki paidbah ha nongbah Shillong sha ka um jong ka Pung Umiam bad ka jaka kaba pawnam ka Living Root Bridge ha Nongriat, katei ka prokram kan pyni ia ka jingitynnad jong ka Meghalaya.
Ha man la ka Episode yn pyni iaka jinglong kyrpang ha kaba iadei bad ka riti ka dustur, bad kajingstad jingshemphang tynrai jong ki paid Khasi halor ka jingdon jingiadei bad ka khyndew ka shyiap bad kakamram ka jongki kum ki nongri nongsumar ia ka mei mariang kaba jyrngam.
Ia katei ka prokram la pyniaid da ka Larisa D’Sa kaban batai bniah ia ka jinglong jingman halor ki bynta ki bapher bapher jong ka Meghalaya.
Kala pynpaw ia ka jingsngewkmen halor ka jingiaid lynti marwei ka jongka ha ka jylla Meghalaya, khamtam ha kaban lap ia ka spah ka phew kaba ym pat ju tip ban iakynduh ia ki riewshimet ha ka lynti iaid ka jongka.
Ia ka Meghalaya, la ju tip kum ka “Abode of Clouds,” bad kadei kaba pawnam ruh ha kaba iadei bad ka jingdon ia ka kolshor kaba kyrpang bad kane ka prokram kan plie lad ia ki nongpeitkai ba kin iohi ia ka rukom im, ka rwai bad katem ka put, kynthup ia ka riti dustutr tynrai bad ki jingbam tynrai kiba pynjawdud ia ki nongpeitkai.
Ka ‘Postcards from Meghalaya’ kan pyni ruh ia ka jingriewspah ha kaba iadei bad ka shet ka tiew tynrai kaba pyni iaka jingriewspah ka thaiñ ha kajinsghet ia ki jingbam tynrai kiba bang.
