Dawa ia ka KHADC ban pynbeit mardor
Nongpoh, Jylliew 10: Ka Federation of Khasi Jaintia & Garo People (FKJGP)-West Khasi Hills, kala bynniaw jur halor ka jingmih ka jingiakynad para Khasi ha Langpih tang namar ka jingiaknieh ia ka hok longtrai ia ka Iew Langpih.
Kane ka jingiaknieh kala mih hapdeng ka Hima Nongmynsaw bad ka kynhun kaba dei jong ka Raidmynsaw.
“Ka Langpih ka dei ka jaka ba jur bha ka jingiaknieh pud hapdeng ka Assam bad Meghalaya. Ka Assam kan sa shim kabu beit na kane ka jingiakynad para Khasi namar wat hapdeng ka jingshongsuk, ka dang iai kyntur pud bad pyni bor” ong ka FKJGP.
Ka FKJGP ka kyntu ia ka KHADC bad ka Sorkar Jylla ba kin tuklar mardor ia kane ka jingiakynad shuwa ba ine i phliah ding iba rit in kylla ka ding kaba klang.
“Ki Hima ki hap hapoh ka jingkhmih ka KHADC. Kumta ka KHADC ka dei ban pynbeit noh mardor shuwa ba kan mih kano kano ka jingjia kaba sngewsih” kala ong.
Ha kajuh ka por, kane ka Seng kala kyntu ia kine ki arliang mamla ba kin iakren pynbeit bad iasngewthuh jingmut noh ban ia imsuk imsain khnang ba ki nongshim kabu na marjan Jylla kin ym iohbor.
