Shillong, Rymphang 17: Ka Meghalaya kala pynkhreh ban iakhun ia ka phainal pyrshah ia ka Nagaland ha ka Plate Group jongka U-23 Men’s Col CK Nayudu Trophy, kaban sdang ha ka sngi u Blei.
Kane ka jingiakhun kan long ha Nagaland Cricket Stadium ha Sovima naduh ka por 9 baje mynstep.
Ha kane ka lynpung iakob ialehkai Cricket ka Meghalaya kala jop baroh 6 sien lynter bad kaba sah mynta ka long ban ialehkai bha ban jop sa shisien ban ioh rah ia ka nam lahduh.
Kane ka jingialehkai kala sdang naduh ka 7 tarik u Kyllalyngkot ha kaba ka Meghalaya kala iakhun pyrshah ia ka Sikkim bad kala jop da 328 run.
Ka Meghalaya kala pynrem ia ka Manipur da 51 run, ia ka Mizoram da 3 wiket, ia ka Arunachal Pradesh da 180 run, ia ka Nagaland da 134 run bad ha ka semi final kala pynrem biang ia ka Mizoram da 107 run.
Ka Meghalaya kala dep ban pynrem teng ia ka Nagaland haka jingialehkai kaba la long ha Nongbah Shillong bad mynta ka jingiakhun ia ka phainal kan long ha madan ialehkai ha Nagaland.
Ki nongialehkai ka Meghalaya kiban iakhun haka phainal jong ka Col CK Nayudu Plate Group ki kynthup ia u Abhishek Kumar, Abhishek Gupta, Agreas Cham Cham Sangma, Badonnam J Mylliemngap, Bipin Kumar Ray, Joydeepan Deb, Kevin Sanjeev Christopher (Captain), Kush Agarwal, Manish Sharma (Vice Captain), Mrityunjay Bharali (Wicket Keeper), Nishanta Chakraborty, PM Santhosh, Sudhir Sahani, Swastic Chettri bad u Wankitlang Nongpluh.
Ki Standby ki kynthup ia u Aman Kumar, Frickey Sangma bad u Sachin Kumar, katba ki Support Staff ki kynthup ia u Neetesh Sharma (head coach), Synrapsing Riahtam (assistant coach), Emidao Dhar (physio), Skhembor Khongbtep (trainer), Chuba R Marak (manager).
