Jorhat, Rymphang 17: Ka Kong Simi Khongtiang kaba dei ka nongshna phlim ka jylla Meghalaya, kala ioh pdiang ia ka khusnam “Best Director” na ka phlim jongka ‘Ka Chithi’ ha ka Prag Cine Awards 2024, kaba la long ha Jorhat, Assam.
Ia kane ka prokram la pynlong ha ka sngi Thohdieng kum shi bynta jong ka jingrakhe iaka jingpynmih phlim ha ka thaiñ shatei lam mihngi.
Ka phlim jong ka Kong Simi Khongtiang kaba dei ha ka ktien Jaintia kala rung ha ki 3 tylli ki kyrdan kiba kynthup ia ka “Best Film,” “Best Actor (Female),” bad “Best Director”.
Ka Kong Simi kaba dei ka kynthei Pnar ba marwei kaba pynmih phlim Jaintia, kala ong, “Kane ka dei ka sngi kaba sngewsarong ia ka iing ka sem jong ka ‘Ka Chithi’. Ki don bun bha ki phlim ha ka thaiñ shatei lam mihngi kiba iakhun ban ioh ia katei ka khusnam. Nga dap da ka jingkmen bad jingsngewrit ban ioh ia kane ka jingithuh”.
Haba kren halor ka jingiaid lynti ka jongka ha ka kam shna phlim, ka KongSimi kala ong, “Kum ka Director, kane kadei ka sien ka baar ba kan shah jied bad kam shym la jop satia ha u snem 2018 hynrei mynta ka kynti pat kala ioh ia ka khusnam”.
Kane kadei ka sien kaba nyngkong eh ia ka Kong Simi Khongtiang ban ioh ia ka khusnam shabar jong ka jylla Meghalaya.
Ka Prag Cine Awards, kadei kaba la bna nam bha ha kaban kyntiew ia ka sap ka phong jong ki paid ka thaiñ shatei lam mihngi bad ka ieng kum ka khusnam kaba kongsan ha ka thain baroh kawei, da ka jingthmu ban kyntiew ia ka kam shna phlim ha ka thain shatei lam mihngi jong ka ri.
