Agartala, Nailar 30 :U Chairman ka TIPRA party ha Tripura, u Pradyot Debabarma ula pynbna ba un pynlut pynsep da lade hi ha ka ba iadei bad ka jingialeh mukotduma jong ki 10323 ngut ki nonghikai skul kiba la shah weng kam.
U chairman ka TIPRA ula pyntip ruh ba ki riewsaid ain kiba tbit jong ka ri kin mihkhmat na ka bynta ki 10323 ngut ki nonghikai skul kiba la shah weng kam hapoh ka iingbishar ba hakhliehduh ka ri, ka Supreme Court.
“Ngi la kyntu ia ki riewsaid kiba shemphang jong ka ri ba kin mihkhmat na ka bynta ki nonghikai hapoh ka iingbishar Supreme Court.Ia ki jinglut jingsep na ka bynta kane ka jingialeh mukotduma ngan sa khmih da lade hi kumba nga la kular,” ong u chairman ka TIPRA, u Pradyot Debabarma.
Lah ban kdew ba u Pradyot Debbarma ula iakynduh ia ki nongmihkhmat jong kine ki 10323 ngut ki nonghikai skul kiba la shah weng kam ka Tripura ha kane ka sngi U Blei ba la lah ha ka nongbah New Delhi.
“Nga la iakynduh ia ki riewsaid ain bad ia ki nongmihkhmat jong ki 10323 ngut ki nonghikai hapoh Delhi.Ki don shibun ki mat kiba pyni ia ka jingkyrmen ia kiba ym pat shym la iakren ha ki por kiba la dep,” ong shuh shuh une u nongialam ka TIPRA.
Haduh kumba 10,323 ngut ki nonghikai skul kila shah weng kam noh hadien ki jingbym biang ha ka rukom pynrung kam, kane ka long katkum ka hukum ba la pynmih da ka iingbishar High Court ka Tripura ha ka snem 2014.Ia baroh kine ki nonghikai la thung kam hala ki jong ki kylla naduh ka snem 2010.
Na ka liang ka iingbishar Supreme Court kala pynksan ia kane ka hukum jong ka iingbishar High Court ha ka snem 2017 hadien ka jingpynsngew ia ka jingkyrpad kaba kyrpang ba la ujor na ka liang ka sorkar Left Front bad kine ki nonghikai ba la shah weng kam.
Kumta ruh kiba bun na kine ki nonghikai kila ioh da kiwei pat ki jait kam ha ki tnat bapher bapher bad haduh kumba 8000 ngut ki nonghikai la pynrung biang kum ki adhoc tad haduh u bnai Lber 2020.Hynrei, hadien kane kila kylla khlem kam khlem jam sa shisien pat.
