Shillong, Rymphang 26 : U Myntri ka Tnad Civil Defence & Home Guards Bah Comingone Ymbon ha ka sngi Nyngong ula ong ba ka Home Guards ka dei ka Voluntary Organization bad ka jingthung ia ki Home Guards Volunteer ka dei da ka mon sngewbha bad ki home guards volunteer kim lah ban kam thungkam pura lane pynneh shirta iaka jingshakri jong ki.
Haba jubab ia ka jingkylli ba wanrah u MLA ka VPP na Nongkrem, u Bah Comingone ula ong ba ka jingthung kam bala kot bun snem kam ai satia ia ka hok ia ki home guard volunteer ba kin bat sah ia ka kam bad ai ia kano kano ka hok halor ka jingthungkam ba shipor ne shirta bad ki agency ba thung ia ki.
Ula ong ba ka Tnad Civil Defence & Home Guards ka dei tang ka Agency jong ki Home Guards Volunteers bala thung da ki Agency bapher bapher. Nalor kane, ki home guards volunteers ki dei kiba shah pyniaid kat kum ki rules bad ki kyndon bala buh da ki agency ba aikam ia ki.
Ka kamram ban siew tulop/allowance sha ki home guard volunteer ruh ka shong ha ki agency ba aikam ia ki, ula ong haba bynrap ba baroh ki kam ba iadei bad ka jingshakri jong kine ki volunteer kumka jingpynsangeh aikam noh ia ki, ka jingthungkam biang, bad kiwei kiwei, ka shong ha ka bor jong ki agency kiba siew ia ki jingsiew baroh.
U Myntri ula ong ba ka Tnad kala pyrshang ban wad ia ki lad ki lynti kumno ban leh eiei halor ki jingud jingnam jong ki Home Guards.
