Shillong, Rymphang 26: Hadien ka jingap ba palat shi taiew ia ka jingshimkhia jong ki bor halor ka jingshah set tulop, ki nongtrei ka Garo Hills Autonomous District Council (GHADC) kila mih da ki spah ngut ban pynlong ia ka jingïakhih ba lai sngi ka bala sdang hynne ka sngi Nyngkong.
Hapoh ka lama jong ka Non Gazetted Employees Association, ki nongtrei ka GHADC kila ialum ha madan Tura Government College ha Teteng A’ja ban sdang iaka jingïakhih.
Ha ryngkat ki Banners bad Placards, ki nongtrei kila dawa ban pyllait noh iaka tulop jong baroh 32 bnai bad naka liang ki nongïalam ka NGEA kila pynpaw ba la bun bun sien kila ju pynsngew shaka Council Executive Committee halor ka tulop hynrei haduh mynta ki khlem pat ioh kano kano ka jingkular kaba la pynlong iaki ban sdang noh daka jingïakhih naduh mynta ka sngi.
Presedent ka NGEA u Brithin M Sangma haba kren sha ki para nongiakhih ula ong ba ki long kiba la kloi ban ïakren lada ki shah khot haki bor ka GHADC naka bynta ban ïakren halor ka tulop.
Ki nongtrei kila sdang iaka jingïakhih naduh ka por 10 baje mynstep haduh 4 baje janmiet.
Kane ka jingïakhih ki nongtrei kan ktah bad ka pyndkoh iaki kam ki jam hapoh ka district council bad mynta ka sngi la sakhi ka jingtylli ki kamram treikam bad ki meij treikam ka ban ktah iaka ioh ka kot jong ka Council.
Naka liang ki nongtrei ka GHADC kila pynlong ka jingïakhih hapoh ka madan jong ka College namar ki bor district kila man ban pynlong ka jingïakhih ha phyllaw treikam ka council.
